बिलासपुर। रेलवे पुलिस ह अमरकंटक एक्सप्रेस म तीन ठन पिंजरा म छुपाके रखे रिहिस 100 ले भी जादा मिट्ठू (तोता) बरामद करे हे। पुलिस के आए के पहिली ही तस्कर ह भाग गे। पेंड्रारोड-बिलासपुर ट्रेन रूट म लकड़ी के तस्करी के मामला आए दिन उजागर होवथ रहीथे, फेर ये बार रेलवे पुलिस ह ये चिरई के तस्करी ल देख अचंभा म पड़ गे।
गुरुवार के भोपाल-दुर्ग-अमरकंटक एक्सप्रेस म अनूपपुर ले बिलासपुर के बीच ट्रेन के एचए 1 कोच अउ जनरल कोच के बीच आरपीएफ ह पक्षी मन के शोर ल सुनीस। चेकिंग करीस त 3 ठन कार्टूननुमा पिंजरा म कपड़ा ल ढक के मिट्ठू ल लेगत रहीस, जेमा करीब 100 ले जादा मिट्ठू मिलीस।
बतात हे कि ये इलाका म शिकारी मन जादा सक्रिय हे। वोमन मिट्ठू ल पकड़ के बिलासपुर सहर म अब्बड़ कीमत म बेचथे। अमरकंटक एक्सप्रेस म मिट्ठू पकड़ाए के बाद आरपीएफ ह यात्री मन ले पिंजरा के मालिक के बारे म पूछताछ करिन, फेर कोनो आघू नई अईस। जेखर बाद मिट्ठू ले भरे पिजरा ल रेलवे सुरक्षा बल पोस्ट बिलासपुर लाए गिस। काबर कि मामला ह वन विभाग ले संबंधित हे, तेखर सती रेलवे पुलिस ह आघू के कार्रवाई बर सब्बो मिट्ठू ल वन विभाग के हवाले करीस हे।
