आबकारी विभाग ह झूठा केस बना के भेजिस जेल, कलेक्टर ले करिस शिकायत
राजनांदगांव। बाजार अतरिया म आबकारी विभाग द्वारा झूठा केस बनाके एक झन निरदोष युवक ल जेल भेजे के मामला सामने आए हे। जनदर्शन म युवक के पिता ह कलेक्टर ले आबकारी विभाग के खिलाफ शिकायत कर जांच करे के मांग करे हे।
अइसन जानकारी मिले हे कि खैरागढ़ आबकारी विभाग ह बाजार अतरिया म अवैध शराब के खिलाफ धरपकड़ अभियान चलाकर शराब कोचिया मन के खिलाफ कार्रवाई करते हे। 28 जुलाई के बाजार अतरिया के रहवईया चंद्रशेखर पिता भिखारी वर्मा ल आबकारी विभाग के टीम ह बिना कोनो सबूत के पकड़ के ले गे अउ उंखर खिलाफ आबकारी एक्ट के तहत 34(2) धारा लगाके सलोनी जेल भेज दिस। सूत्र मन के अनुसार चंद्रशेखर के खिलाफ अभी तक कोनो प्रकार के मामला थाना म दर्ज नई हे अउ ना अब तक गांव वाले मन ह ओला शराब बेचत देखे हे।
ये मामला ल ले के चंद्रशेखर के पिता भिखारी वर्मा ह राजनांदगांव म कलेक्टर जनदर्शन कार्यक्रम म कलेक्टर ले शिकायत करे हाबय कि हमर परिवार ल आबकारी विभाग खैरागढ़ ह परेशान करत हे अउ झूठा मामला बनाय हे। हमन रोजी मजदूरी कर अपन जीवन बीतावत हन। मोर तीन झन बेटा हे, जे मन अलग-अलग रिहिके मजदूरी करते हे। आबकारी विभाग ह आये दिन मोर बड़े बेटा अमृत वर्मा के खिलाफ झूठा केस बनाए के धमकी देके पईसा के मांग करत आवत हे अउ अभी तक वो ह आबकारी विभाग खैरागढ़ ल दू लाख रूपिया दे डारे हे। ये मामला के निष्पक्ष जांच कर दोषी मन के खिलाफ कार्रवाई करे जाए।
