लईका मन के करवाए मोबाईल चोरी ताहन नेपाल जाके बेच दे.. गिरोह के तरीका सुनके आप दंग रहि जहू

बिलासपुर. जिला के पुलिस ह एक अईसे गिरोह के पर्दाफास करे हे जेन ह पहिली तो लईका मन ले मोबाईल चोरी करवाए ओखर बाद नेपाल ले जाके जम्मो मोबाईल ल बेचवा दे। गिरोह ले ट्रेनिंग ले लईका मन के अंदाज अईसन शातिराना रिहिन कि कोनों ल एखर भनक तक नई होत रहिन। जब ओमन पकड़ म आईस त पुलिस घलो दंग रहिगे।

पुलिस ह ओखर मन तीर ले सात लाख रुपिया कीमत के 37 मोबाईल फोन बरामद करे गे हे। सात आरोपी मन ल घलो गिरफ्तार करे गे हे जेमा चार नाबालिग लईका मन शामिल हे। पुलिस ह बतात हे कि गिरोह के सरगना झारखंड निवासी सूरज मंडल, दिलीप चौधरी अऊ राजेश चौधरी मिलके ए रैकेट ल चलात रिहिस। एमन लईका मन ल अईसे ट्रेनिंग दे रिहिस कि लईका मन भीड़भाड़ वाला इलाका म सक्रिय रहय।

एखर बर ओमन सब्जी मार्केट, फल मार्केट अऊ कपड़ा मार्केट के संगे-संग जम्मो भीड़भाड़ वाला इलाका म मौजूद रहय। जईसे मोबाइल ले चोरा के भागतिस ताहन दूसर साथी ल दे दे अऊ अपन कपड़ा ल बदलके रेल्वे स्टेशन कोती भाग जाए। उहां ले वापस अपन राज्य झारखंड भाग जाए। ए गिरोह बिलासपुर, रायपुर, कोरबा अऊ जांजगीर चांपा म कई घटना ल अंजाम दे चुके हे।

रविवार के दिन थाना प्रभारी ल एखर सूचना मिले रिहिस कि बृहस्पति बाजार म कुछ दिन ले कुच युवक मन संदिग्ध अवस्था म घूमत हे। पुलिस टीम ह युवक मन ले पूछताछ करिन त शक होईस। कड़ाई ले पूछताछ के बाद युवक मन स्वीकार कर लिन कि ए जम्मो मामला ह उजागर होईस। ओमन बतईस कि गिरोह के दूसर सदस्य मन रेलवे स्टेशन म हे। गिरोह के सरगना लईका मन ल 100 मोबाइल चोरी करे के टारगेट फिक्स करत रहिस। एखर बदला म 10 ले 15 हजार रुपिया ओमन ल दे दे जात रिहिस। फेर झारखंड लौटके गिरोह नेपाल बर निकल जाए।