आरक्षक के करतूत ले परेशान गांव वाले मन पहुंचिस थाना, एसआई ले करिन हटाए के मांग

जशपुर। दुलदुला गांव म  एक आरक्षक के करतूत ले परेशान होके दू दर्जन ले जादा ग्रामीन मन ह थाना पहुंच गे। गांव वाले मन ह उंहा के एसआई से मिलके वो आरक्षक ल हटाए के मांग करिन हे।

जानकारी के मुताबिक दुलदुला थाना म पदस्थ आरक्षक के घर हर रोज लड़की मन आवत रहिथे। जेला ले के गांव म तरह-तरह के चर्चा हे।  आज बिहनिया गांव वाले ल सूचना मिलिस कि आरक्षक ह अपन घर म फेर लड़की लेके आए हे, ताहन ग्रामीण मन म रोष भर गे।

तत्काल दू दर्जन ले जादा गांव वाले मन आरक्षक के कमरा के बाहर जमा हो गे अउ उंखर बाहिर आए के इतंजार करत रिहिन। फेर आरक्षक ह कमरा ले पहिली ही चल दे रहिस,  उही समय कमरा अकेली युवती मौजूद रिहिस। जेकर बाद ग्रामीण मन ह तुरंत दुलदुला थाना प्रभारी ल फोन कर आरक्षक के करतूत के बारे म बताईस हे। थाना प्रभारी के प्रवास ह होय के वजह ले महिला स्टॉफ ह आरक्षक के कमरा म जाके युवती ल थाने लईस हे।

ये मामला म दुलदुला थाना प्रभारी के कहिना हे कि युवती ल आरक्षक के घर से बरामद करे गिन हे, फेर मामला का हे ये तो युवती के बयान के बाद सामने आही। मामला म युवती ले पूछताछ के बाद ही कोनो तरह के जानकारी सामने आ सकही। उंहे गांव वाले मन के मांग हे कि तत्काल प्रभाव ले वो आरक्षक ल उंखर पद ले हटा दे जाए।