अब जउन होही तेखर बात हे निराला, सब्बो देखइया मन कहीं “जोहार छत्तीसगढ़”…

रायपुर। मया होगिस-दुलार होगिस, लड़ई-झगरा होगिस अउ मारधाड़ तको होगिस। लेकिन, अब जउन होवइया हे, ओखर बाते एकदम अलग हवय। काबर कि एला अब जउन देखही तउन, अतका तो कहिबेच करहीं कि- वाह! मजा आगे जी, एला कइथे… जोहार छत्तीसगढ़। ए बीच खुशी के बात इहू हरय कि हाल ही मा ए फिलिम के टीजर तको लांच करे जा चुके हे।

छत्तीसगढ़ अउ छत्तीसगढ़ी फिलिम के मयारु मन बर खासतौर से बनाय जात छत्तीसगढ़ी फिलिम ‘जोहार छत्तीसगढ़’ के शूटिंग हर अब लगभग पूरा हो चुके हे। यानी ये फिलिम हर अब रिलीज के लिए तइयार हे। आप मन ला बता दे जाय कि कुछ दिन पहिली छत्तीसगढ़ के सिरजन दिवस के कार्यक्रम के शुभ अवसर मा ” जोहार छत्तीसगढ़ ” के टीज़र रिलीज करे जा चुके हे। ए बीच छत्तीसगढ़ क्रांति सेना के प्रदेश  अध्यक्ष अमित बघेल, उपाध्यक्ष अजय यादव अउ क्रांति सेना के सदस्य मन तको मौजूद रहिन। ए जम्मो झन के बीच मा विधिवत ढंग से फिलिम के टीजर रिलीज़ करे गिस।

फ़िल्म के निर्माता व नायक राज साहू अउ  निर्देशक व नायक देवेन्द्र जांगड़े मन बतइन कि जोहार छत्तीसगढ़ फिलिम ला 2020 में जनवरी में ही रिलीज़ करे के पूरा तइयारी हे। ए फिलिम मा छत्तीसगढ़ क्रांति सेना के सबले ज्यादा सपोर्ट मिलत हवय। साथ ही क्रांति सेना के सेनानी मन भी ए फिलिम मा जबर भूमिका निभाय हंवय। बताय जावत हे कि जनवरी मा रिलीज होवइया छत्तीसगढ़ी फिलिम ‘जोहार छत्तीसगढ़’ हमर माटी के हक अउ जोस ले लबालब हवय।