विधानसभा म सबले अलग अंदाज म दिखिस कांग्रेस विधायक लक्ष्मी ध्रुव

जय जोहार रायपुर…. छत्तीसगढ़ विधानसभा के बजट सत्र म पहुंचिस कांग्रेस विधायक लक्ष्मी ध्रुव ह आज सबले अलग अंदाज म दिखाई दिस। जेखर नजर ओखर म पड़िस, वो हा टकटकी लगाए देखत रह गे। नेता मन ह तारीफ के पुल बांधना शुरू कर दिस। एखर कारण विधायक के साड़ी रहिस।

दरअसल धमतरी जिला के सिहावा ले कांग्रेस विधायक लक्ष्मी ध्रुव ह अपन बर एक स्पेशल साड़ी बनवाए हे, जेमा छत्तीसगढ़ के राज गीत लिखे गे हे। साड़ी म लिखे गिस हे… अरपा पैरी के धार महानदी हे अपार, इंदिरावती हर पखारय तोरे पईयां, महूं विनती करव तोर भुँइया, जय हो जय हो छत्तीसगढ़ मईया। ये गीत ल कांग्रेस सरकार ह राज गीत घोषित कर दे हे। एखर रचयिता महान भाषाविद् स्व. नरेंद्र वर्मा हे। बता दन कि विधानसभा के आज ले बजट सत्र शुरू हो गिस हे, जेन ह एक अप्रैल तक चलही।