मेडिकल शिक्षा ले जुड़े संस्थान अऊ कालेज नई होही बंद, छुट्टी होइस रद्द
जय जोहार रायपुर…. प्रदेश भर के मेडिकल शिक्षण संस्थान मन म छुट्टी के उम्मीद म पानी फेर गे हे। स्वास्थ्य मंत्री टीएस सिंहदेव ह कहिन कि प्रदेश म संचालित मेडिकल शिक्षा ले जुड़े संस्थान बंद नई होही। कोरोना वायरस ले लड़े म एखर अहम भूमिका होही। अगर हास्पिटल अऊ मेडिकल शिक्षण संस्थान मन ल बंद करे जाही, त मोर्चा म कौन तैनात होही।
स्वास्थ्य मंत्री ह कहिन कि ए स्कूल, कालेज, आंगनबाड़ी, जिम, स्विमिंग पूल, लाइब्रेरी ल बंद करना अलग बात हे, लेकिन मेडिकल शिक्षा ले जुड़े संस्थान अऊ मेडिकल कालेज मन ल बंद नई करे जाही। बीमारी ले पीड़ित लोग मन के इलाज इहीं होना हे। अइसे म इन संस्थान मन ल बंद कर दिए जाए, त हाहाकार मच जाही।
स्वास्थ्य मंत्री ह कहिन कि कोरोना वायरस ले लड़े बर ए सबो के अहम भूमिका होही। इसलिए स्वास्थ्य विभाग म ए घलो आदेश जारी करे गे हे कि कोनो छुट्टी न ले, अति आवश्यक होए म सूचित करे।
