कई इलाका के शराब दुकान होगे बंद, राजधानी रायपुर म धारा 144 लागू

जय जोहार रायपुर…. कोरोना के मद्देनजर राजधानी रायपुर के कई इलाका मन के शराब दुकान ल घलो बंद करे के आदेश जारी करे गे हे। रायपुर म धारा 144 लागू कर दे गे हे। एखर तहत सभा, आयोजन, बैठक अऊ अन्य कार्यक्रम मन ल घलो प्रतिबंधित कर दे गे हे। ए संबंध म जानकारी रायपुर कलेक्टर एस भारतीदासन अऊ एसपी आरिफ शेख ह प्रेस कांफ्रेंस म दे हे। राजधानी के समता कालोनी अऊ चौबे कालोनी ल सैनिटाइज करे गे हे। ऊहचे ओ क्षेत्र के दुकान मन ल घलो एहितियातन बंद करे के आदेश दे गे हे। कलेक्टर भारतीदासन के मुताबिक मीटिंग, आयोजन, वैवाहिक कार्यक्रम मन म घलो तत्काल प्रभाव ले रोक लगा दे गे हे।

ऊहचे एसपी आरिफ शेख ह बताइस कि लोग अगर जान बूझ के अपन कोरोना रोग के बारे म जानकारी नई देत हे, ट्रैवल हिस्ट्री ल छुपात हे अऊ भीड़भाड़ वाला जगह म जात हे, त संबंधित व्यक्ति के खिलाफ अलग-अलग धारा के तहत कार्रवाई करे जाही। समता कालोनी, चौबे कालोनी, गुढ़ियारी के अंतर्गत रेस्टोरेंट, क्लब, बार, शराब दुकान, एसोसिएशन बिल्डिंग ल अवइया आदेश तक बर बंद कर दे गे हे।