जय जोहार रायपुर…. लॉकडाउन के चलत फंसे दिहाड़ी मजदूर अऊ जरूरतमंद गरीब मन ल माकपा अऊ सीटू कार्यकर्ता के तरफ ले पिछिले एक सप्ताह ले प्रतिदिन भोजन पैकेट वितरित करे जात हे। आज माकपा अऊ सीटू कार्यकर्ता मन ह रामनगर, गोकुल नगर के मजदूर बस्ती, त्रिमूर्ति नगर, डंगनिया खदान बस्ती, चंडीनगर, मोवा, डब्ल्यूआरएस कालोनी, अमलीडीह अऊ मठपारा के जरूरतमंद लोग मन ल 2000 पैकेट भोजन पैकेट अऊ राशन के सामान वितरित करे गिस।
माकपा के राज्य मंडल सदस्य धर्मराज महापात्र ह बताइस कि लॉकडाउन के चलत काम बंद होय ले दिहाड़ी मजदूर के समक्ष भुखमरी जैसा हालात बन गे हे। हालांकि सरकार ह शासकीय राशन दुकान मन ले कार्ड धारक मन ल राशन वितरित करत हे, लेकिन बहुत ले अईसे गरीब अऊ मजदूर परिवार हे, जेखर पास राशन कार्ड नई हे। कई लोग अईसे घलो हे, जेन किराए के मकान म रहत हे। अईसे परिवार मन ल मदद उपलब्ध कराए बर माकपा अऊ सीटू कार्यकर्ता मन ह गरीब परिवार मन के घर म राशन अथवा भोजन पैकेट उपलब्ध कराए बर अभियान चलात हे।
