जय जोहार रायपुर…. भाजपा प्रदेश प्रवक्ता सच्चिदानंद उपासने ह प्रदेश के मुख्यमंत्री भूपेश बघेल म कटाक्ष कर जानना चाहा कि कोरोना वायरस संक्रमण ले वैश्विक संकट ले निपटे बर प्रदेश सरकार के का योगदान हे। वो हा कहिन कि प्रदेश सरकार ह कोरोना के वैश्विक संकट म घलो वाहवाही बटोरे के हास्यास्पद उपक्रम करत हे। मुख्यमंत्री भूपेश बघेल ह लाकडाउन ले प्रभावित जरूरतमंद गरीब अऊ मजदूर परिवार मन बर जेन 60 करोड़ रूपिया जारी करे के घोसना करिस। वो केंद्र सरकार के तरफ ले प्रदत्त आपदा प्रबंधन मद के राशि हे। केंद्र के राशि ल जारी कर श्रेय लेवत प्रदेश सरकार ए राशि म अपन हिस्सा के तीस फीसदी अंशदान के बारे म चुप्पी साधे बइठी हे।
भाजपा प्रदेश प्रवक्ता सच्चिदानंद ह कहिन कि प्रदेश सरकार अऊ कांग्रेस के नेता ये नई बतात हे कि कोरोना के खिलाफ चलत ए जंग म प्रदेश सरकार के खजाना अऊ मुख्यमंत्री राहत कोष म संगृहीत राशि के उपयोग कहां अऊ कईसे होवत हे या फेर ये राशि ह कब इस्तेमाल होही। आपदा प्रबंधन के जारी राशि म ले गरीब अऊ मजदूर मन के खाता म जमा करे गिस राशि के ब्योरा घलो सार्वजनिक करे जाना चाही।
