आंगनबाड़ी के बच्चा मन के समग्र विकास बर सीएम ह करिन चकमक अभियान अऊ सजग कार्यक्रम के शुभारंभ
जय जोहार रायपुर…. मुख्यमंत्री भूपेश बघेल ह आज आंगनबाड़ी के बच्चा मन के समग्र विकास बर महिला बाल विकास विभाग के तरफ ले यूनिसेफ के सहयोग ले तैयार करे गे चकमक अभियान अऊ सजग कार्यक्रम के शुभारंभ करिन। बच्चा मन के रचनात्मक विकास बर चकमक अभियान के तहत लॉकडाउन के दौरान जब आंगनबाड़ी बंद हे। बच्चा मन ल घर म ही पारिवारिक सदस्य, दादा-दादी, नाना-नानी के संग रचनात्मक गतिविधि म व्यस्त रख के सिखाय के पहल करे जाही।
परिवारिक सदस्य मन ल बच्चा मन के संग आनंदपूर्ण गतिविधि कराय जाही। एखर संगेसंग बच्चा मन के स्वास्थ्य, पोषण अऊ समग्र विकास के प्रक्रिया ल घर तक बढ़ावा दे के उद्देश्य ले यूनिसेफ के तकनीकी सहयोग ले तैयार करे गे सजग कार्यक्रम के शुरुआत करे गिस। ए दौरान मुख्यमंत्री भूपेश बघेल ह हल्बी अऊ गोंडी बोली म दु पुस्तिका मोद्दोल डाका अऊ पहिल डांहका के विमोचन करिन। गोंडी बोली म मोद्दोल डाका अऊ हल्बी बोली म पहिल डांहका का अर्थ पहला कदम होवत हे।
ए अवसर म महिला एवं बाल विकास मंत्री अनिला भेंडि़या, महिला एवं बाल विकास विभाग के सचिव सिद्धार्थ कोमल सिंह परदेशी, संचालक जन्मेजय महोबे, यूनिसेफ फील्ड ऑफिस प्रमुख जोब जाकरिया उपस्थित रहिस। यूनिसेफ के भारत के प्रमुख यास्मिन अली हक ह वीडियो कॉफ्रेंसिंग के माध्यम ले ये कार्यक्रम में शामिल होइस।
