रायपुर। विधानसभा सत्र के दूसर दिन विधानसभा के घेराव करे बर निकले कांग्रेसी मन ल लोधीपारा चउक के तीर पुलिस ह रोक दिस। ये दउरान कांग्रेसी मन ह सरकार विरोधी नारा लगात हुए जमके हंगामा घलो करिन । बताय जात हे के ये दउरान कांग्रेसी मन अउ पुलिस म झड़प घलो होइस। अउ पुलिस ल हल्का बल के प्रयोग करे बर पड़िस।
बतादन के कांग्रेस ह आज महंगाई, कर्मचारी मन के सुविधा, पुलिस परिवार के जायज मांग, स्कूल कॉलेज म मनमाना फीस लेय, बेरोजगारी अउ अइसे कई ठन मुद्दा मन ल लेके विधानसभा घेरे के ऐलान करे रिहिन हे। येकर पहिलि कांग्रेस के नेता अउ कार्यकर्ता मंडी गेट के तीर सकलाइन।
विधानसभा घेरे सकलाय कार्यकर्ता मन ल प्रदेश कांग्रेस के बड़े नेता मन ह संबोधित करिन। येकर बाद जइसे ही कांग्रेसी मन ह विधानसभा बर कूच करिन। वइसे ही पुलिस ह उमन ल रोक लिस। पुलिस ह जगह-जगह बैरिकेट्स लगाके पहिलि ले तइयारी कर रखे रिहिस हे। लोधीपारा चउक म तइनात पुलिस ह कांग्रेसी मन ल आगे बढ़े ले रोके बर। येमा बहस घलो होइस, अउ फेर झूमाझटकी घलो होइस। हालत ल देखत हुए पुलिस ह हल्का बल प्रयोग करिस अउ लाठी ल घलो लहराइस।
