जय जोहार. छालीवुड म कई साल ले काम करत नितेश लहरी ह अब लेखन के क्षेत्र म अपन जौहर दिखात हे। ओखर दुआरा लिखित छत्तीसगढ़ी फ़ीचर फिल्म फंटूश ह अब एजाज वारसी अऊ पुनीत सोनकर ग्रुप ह बनाए के बीड़ा उठाए हे। ऐखर विधिवत एमओयू आज होईस जेमा एजाज वारसी अऊ नितेश लहरी ह दस्तखत करिन।
कहानीकार नितेश लहरी ह जय जोहार ल बताईन कि फंटूश ह ओखर तीसर स्क्रीप्ट रहे। ऐखर पहिली आशिक मया वाले अऊ आशिक छत्तीसगढ़िया जईसे फिलिम के कहानी ल ओमन ह लिखे हावे। आशिक मया वाले ल नितेश ह निर्देशित घलो करे हे। ऐखरे संगे संग आशिक छत्तीसगढ़िया के शूटिंग लगभग पूरा होए के बारी आगे हे। फिलिम के शूटिंग 10 परसेंट बाकी हे। नितेश के मानना हे कि ऐ क्षेत्र म कोई भी मनखे म अलग-अलग टैलेंट के होना अब्बड़ जरूरी हे काबर कि ऐके टैलेंट के भरोसा म सिनेमा क्षेत्र में आगे नई बढ़े जा सके। नितेश के कहिना हे कि ओमन ह नाटक म एक्टिंग से लेके फिलिम म सह-निर्देशन के संगे संग कैमरा के घलो काम करे हे। अऊ अलग-अलग क्षेत्र के इही अनुभव के लाभ ओला फिलिम लाईन म मिलत हे।
