छत्तीसगढ़ म घलो चक्रवाती तूफान के परही असर, तेज आंधी अऊ तूफान के संग ए दिन होही बारिश

जय जोहार…. बंगाल के खाड़ी म बने साइक्लोन के असर ह कई राज्य के संगेसंग छत्तीसगढ़ म घलो पड़इया हे। जेखर ले तेज हवा, आंधी अऊ तेज बारिश के संभावना जताये गे हे। काली बारिश होय के संभावना हे। संगेसंग 17 मई के घलो तेज-आंधी अऊ तूफान ह अवइया हे। एला लेके मौसम विभाग ह अलर्ट जारी करे हे।

मौसम विभाग के मुताबिक काली कई जिला म आंधी के संग बारिश होय के संभावना हे। संगेसंग कई जगह आकाशीय बिजली घलो गिर सकत हे। एक द्रोणिका ह महाराष्ट्र ले दक्षिण कर्नाटक तक ऊचाई म स्थित हे। एखर संग बंगाल के खाड़ी ले नमी ह दक्षिण छत्तीसगढ़ म आवत हे। जेखर सती काली दक्षिण छत्तीसगढ़ म गरज-चमक के संग बारिश होय के संभावना हे। अवइया 24 घंटा म प्रदेश के सब्बो संभाग म तामपान म घलो वृद्धि होही।