जय जोहार…. छत्तीसगढ़ म कोरोना (corona) ले जुड़े एक बड़का खबर आवत हे। छत्तीसगढ़ म आज बिहिनिया एक अऊ कोरोना (corona) पाजिटिव मरीज मिले हे। ए मरीज ह राजनांदगांव के डोंगरगढ़ म मिले हे। जानकारी के मुताबिक ए मरीज ह राजनांदगांव के डिप्टी कलेक्टर के ड्राइवर हे। अधिकारी के ड्यूटी ल बागनदी बार्डर म लगाय गे रहिस।
राजनांदगांव म 12 घंटा के भीतर ए पांचवां मरीज मिले हे। एखर पहिले काल चार मरीज ह मोहला इलाका म मिले रहिस। जेन प्रवासी मजदूर रहिस। आज पाय गिस कोरोना (corona) संक्रमित युवक ह डोंगरगढ़ इलाका के रहवइया हे। ओला राजनांदगांव मेडिकल कालेज म भर्ती कराय गे हे।
बता देन कि दू दिन पहिले एहितियातन ड्राइवर के टेस्ट कराय गे रहिस। जेमा ओखर रिपोर्ट ह पाजिटिव आय हे। प्रदेश म ए नवा मरीज के संग एक्टिव मरीज मन के संख्या ह बाढ़ के 42 हो गे हे। ऊहचे कुल मरीज मन के संख्या ह 102 हो गे हे। एमा ले 59 मरीज ह स्वस्थ होके अपन घर लहुट चुके हे।
