Congress : कांग्रेस ह कहिन – पहले मजदूर मन ल मजबूर करिन, अब ओखर अपमान करत हे भाजपा

जय जोहार…. कमाय-खाय बर गे आन राज्य ले छ्त्तीसगढ़ के मजदूर मन के लहुटने म कुछु के कोरोना संक्रमित पाय जाय म भाजपा के प्रतिक्रिया म कांग्रेस ह गहरा दुख व्यक्त करे हे। छत्तीसगढ़ प्रदेश कांग्रेस (congress) संचार विभाग के अध्यक्ष शैलेश नितिन त्रिवेदी ह कहिन कि पहले मजदूर मन ल मजबूर करिन, अब भाजपा ह ओखर अपमान करत हे। अगर बाहर कमाय-खाय बर गे हमर मन के छत्तीसगढ़ के मजदूर ह कोरोना संक्रमण सेति वापस आवत हे अऊ ओमा ले कुछु लोगन मन ह संक्रमित हे, त ए अव्यवस्था कह के भाजपा नेता मन ह सब्बो मानवीय संवेदना ल ताक म रख दे हे। ए मजदूर ह छत्तीसगढ़ महतारी के बेटा हे।

छत्तीसगढ़ प्रदेश कांग्रेस (congress) संचार विभाग के अध्यक्ष शैलेश नितिन त्रिवेदी ह कहिन कि भाजपा ह त अईसे बात कर के मजदूर मन ल अपमान करे के कोशिश ल न करे। कोरोना संक्रमण के परिस्थिति बर भाजपा के केन्द्र सरकार ह जिम्मेदार हे। केन्द्र सरकार के प्रबंधन ह आज के परिस्थिति ल पैदा करे हे। भाजपा के केन्द्र सरकार ह अंतर्राष्ट्रीय हवाई अड्‌डा म अवइया के जांच नई करवाइस अऊ संदिग्ध ल क्वारेंटाइन नई करिस।

छत्तीसगढ़ प्रदेश कांग्रेस (congress) संचार विभाग के अध्यक्ष शैलेश नितिन त्रिवेदी ह कहिन कि अब मजदूर मन के घर, गांव अऊ छत्तीसगढ़ वापस आय म कोरोना के कुछु मामला ह सामने आवत हे, त भाजपा नेता ह गरीब अऊ मजदूर विरोधी बयान देके स्तरहीन राजनीति करत हे। ए गरीब अऊ मजदूर विरोधी राजनीति ल छत्तीसगढ़ के लोगन मन ह सहन नई करही।