छत्तीसगढ़ म फेर मिलिस पांच नवा कोरोना संक्रमित मरीज, अब ए जिला म कोरोना ह दे हे दस्तक

जय जोहार…. छत्तीसगढ़ म कोरोना संक्रमित मरीज मन के संख्या ह सरलघा बाढ़त जात हे। शुक्रवार के कोरोना ह महासमुंद जिला के सराईपाली म घलो दस्तक दे दे हे।

प्रदेश म पांच नवा कोरोना पाजिटिव मरीज मन के पहचान होय हे। बिलासपुर म दू, जगदलपुर, महासमुंद अऊ दुर्ग जिला म एक-एक पाजिटिव मरीज मिले हे। जबकि गुरुवार रात म मुंगेली जिला म एक कोरोना मरीज मिले रहिस। प्रदेश म अब सक्रिय मरीज मन के कुल संख्या ह बाढ़ के 321 हो गे हे।

बता देन कि छत्तीसगढ़ म कोरोना ले सक्रिय मरीज मन के संख्या ह 321 पहुंच गे हे। अब तक राज्य म कुल कोरोना संक्रमित मरीज मन के संख्या ह 404 हो गे हे। जेमा ले 83 लोगन मन ह स्वस्थ होके अपन घर लहुट चुके हे।