आज भी दंगल टी वी म प्रतिभा देखात हे अंचल के अभिनेत्री शोभिता ह, “महिमा शनिदेव की” म करे हे अभिनय

जय जोहार….दीपक 52 कर। आप मन ल याद होही छत्तीसगढ़ी अल्बम “का तैं जादू करे” जेन ह बहुत लोकप्रिय होय रिहिस, एमा अपन अभिनय अऊ डांस ले सबला प्रभावित करे वाली अभिनेत्री आय शोभिता श्रीवास्तव। शोभिता ह छत्तीसगढ़ के संगे संग मुम्बई म घलो अपन अभिनय के झंडा गाड़े हे, मुम्बई म राहत हुए शोभिता ह कई ठन धारावाहिक म काम करिस अऊ छत्तीसगढ़ ल पहचान देवाइस ।

शोभिता ह दूरदर्शन के सीरियल म संचालन घलो करिस, एखर आलावा वो ह फीचर फिलिम “बिदाई” म मुख्य भूमिका अदा करे रिहिस। बता देन कि जब छत्तीसगढ़ म अल्बम के दौर रिहिस तब अल्बम के पहिली गाना म हीरो कोई भी हो लेकिन अभिनेत्री शोभिता ही रहाय। अभी दंगल टी वी म प्रसारित महिमा शनिदेव की म शोभिता अभिनय करत नजर आत हे।