जय जोहार…. राजधानी रायपुर म नगर निगम के 10 जोन म आज अध्यक्ष ह चुने जाही। जेखर बर निर्वाचन के प्रक्रिया होही। जोन अध्यक्ष पद के उम्मीदवार ह अपन-अपन जोनल कार्यालय म नामांकन ल दाखिल करही। सब्बो प्रक्रिया ह होय के बाद दोपहर म मतदान, ओखर तुरते बाद मतगणना अऊ परिणाम के घोसना करे जाही।
आयुक्त सौरभ कुमार के मुताबिक दोपहर 12.10 बजे ले 12.15 बजे तक प्रथम सम्मिलन वार्ड समिति के जोन अध्यक्ष के निर्वाचन के तारीख ल सूचना पटल जोन कार्यालय म दे जाही। एखर बाद 12.15 बजे ले 12.45 बजे तक प्रथम सम्मिलन वार्ड समिति के जोन अध्यक्ष के नामांकन पत्र प्रस्तुत करे जाही। एखर बाद 12.45 बजे ले 12.50 बजे तक नाम निर्देशन पत्र के संवीक्षा करे जाही। फेर सही पाये गे नाम निर्देशन पत्र के आधार म अभ्यर्थी मन के नाम के प्रकाशन होही। 12.50 बजे तक नाम ल वापस ले जा सकत हे। दोपहर 1.05 बजे ले 1.20 बजे तक मतदान होही। ओखर तुरते बाद मतगणना अऊ परिणाम के घोसना करे जाही।
