रायपुर म इतवार ले खुलही चर्च, दिन म चार बार होही प्रार्थना

जय जोहार…. राजधानी रायपुर म इतवार ले चर्च ल खोले जाही। एखर पहिली मसीही समाज के सब्बो पादरियों के संगठन ह बइठक कर के चच म आनलाइन आराधना करे के फइसला ले रहिस। अब सरकार के नियम के अनुसार प्रवेश अऊ निकासी बर अलग-अलग दरवाजा, प्रवेश के पूर्व सेनिटाइजर, हाथ धोय अऊ थर्मल स्क्रीनिंग के इंतजाम के संग सोशल डिस्टेंसिंग के धियान रखे जाही। एखर संग 65 वर्ष ले जियादा व्यक्ति, 10 साल ले कम उम्र के लईका, गर्भवती महिला अऊ बुखार, सर्दी खांसी या आन बीमारी वाले लोगन मन ल अंदर प्रवेश नई मिलही।

चर्च के फादर जान पुंनोरे ह बताइस कि सरकार के तरफ ले जारी दिशा-निर्देश के पालन करत हुये चर्च ल खोले के फइसला ले गे हे। बगैर मास्क पहने कोनो ल अन्दर प्रवेश नई दे जाही। सब्बो ल नियमित मास्क पहनना अनिवार्य हे। चर्च के अन्दर प्रवेश करे के पहले सब्बो ल अपन हाथ अऊ बॉडी ल सैनिटाइज करे ल होही। जेखर व्यवस्था ल बनाय जावत हे। चर्च के अन्दर बइठे बर व्यवस्था म बदलाव करत हुए टेबल ल छह फीट के दूरी बना के रखे जाही। वो हा बताइस कि चर्च म भीड़ ल कम करे बर दिन म चार बार अलग-अलग समय म प्रार्थना होही। पहिले एक बार पूजा होवत रहिस। पूजा बर वार्ड वाइस परिवार मन ल बुलाय जाही।