जय जोहार। मुख्यमंत्री भूपेश बघेल ह आज मन्त्रिमण्डल के बइठक लीन। एमा वर्तमान व्यवस्था ल जारी रखत हुये लाकडाउन नई लगाय जाय के फइसला ले गे हे। एखर आलावा मास्क के अनिवार्यता ल बरकरार रखे गे हे। मन्त्रिमण्डल के बइठक के बाद प्रदेश के स्वास्थ्य मंत्री टीएस सिंहदेव ह मीडिया ले चर्चा म कहिन कि लाकडाउन ह समस्या के कोनो समाधान नई हे। ए दौरान मास्क ल अनिवार्य बनाय ल लेके सहमति जरूर बने हे।
कृषि मंत्री रविंद्र चौबे ह कहिन कि जइसे अभी चलत हे, वइसे ही चलही। लाकडाउन नई होही। ऊहचे मास्क नई लगइया ले 100 रूपिया जुर्माना ले जाही। कृषि मंत्री चौबे ह जुलाई माह ले स्कूलों म प्रवेश ल सुरू करे के छटू दे के बात कहिस। एखर संग 20 अगस्त के राजीव गांधी न्याय योजना के दूसर किस्त ल किसान मन ल दे के बात कहिस।
बइठक म गृहमंत्री ताम्रध्वज साहू, कृषि मंत्री रविंद्र चौबे, स्वास्थ्य मंत्री टीएस सिंहदेव, वन मंत्री मोहम्मद अकबर, प्रेमसाय सिंह टेकाम, अनिला भेंड़िया, डॉ. शिवकुमार डहरिया, जयसिंह अग्रवाल, गुरु रुद्रकुमार, कवासी लखमा, अमरजीत भगत, उमेश पटेल समेत मुख्य सचिव आरपी मंडल आदि उपस्थित रहिस।
