केन्द्रीय मंत्री रामविलास पासवान ह राज्य के खाद्य मंत्री के ले हे बइठक, छत्तीसगढ़ के पीडीएस के करिन तारीफ
जय जोहार…. राज्य के खाद्य मंत्री अमरजीत भगत के आज वीडियो कांफ्रेंसिंग ले केन्द्रीय खाद्य मंत्री रामविलास पासवान ले चर्चा होइस। ए दौरान खाद्य मंत्री भगत ह कहिन कि वन नेशन वन राशन कार्ड योजना ल अवइया अगस्त महिना ले सुरू करे जाही।
वो हा केन्द्रीय खाद्य मंत्री ले राज्य के बीपीएल परिवार ल जुलाई ले सितंबर तक तीन महिना के खाद्यान्न ल मुफ्त प्रादय करे जाए बर छत्तीसगढ़ ल आबंटन दे जाय के आग्रह करिन। खाद्य मंत्री भगत ह केन्द्रीय मंत्री ले प्रवासी श्रमिक मन ल घलो जुलाई महिना म खाद्यान्न ल मुफ्त प्रदान करे के अनुरोध करिन।
खाद्य मंत्री ह बताइस कि वर्तमान म छ्ततीसगढ़ के प्रवासी श्रमिक मन ल मई अऊ जून के मुफ्त खाद्यान्न दे जावत हे। ए दौरान केंद्रीय खाद्य मंत्री रामविलास पासवान ह छत्तीसगढ़ राज्य म सार्वजनिक वितरण प्रणाली के पारदर्शिता के सराहना करे हे।
वो हा कहिन कि छत्तीसगढ़ के पीडीएस सिस्टम ह पूरा देश म अव्वल अऊ अनुकरणीय हे। केंद्रीय मंत्री ह बताइस कि प्रधानमंत्री गरीब कल्याण योजना के तहत अवइया तीन महिना बर नि:शुल्क खाद्यान्न आबटन अऊ प्रवासी श्रमिक मन ल जुलाई म घलो नि:शुल्क खाद्यान्न दे के प्रस्ताव ह विचाराधीन हे। पासवान ह हरसंभव सहयोग के भरोसा दिलाय हे।
