बस संचालक मन ह अब घर बइठे ले सकही स्पेशल परमिट, अस्थायी परमिट के प्रक्रिया ह घलाे होय हे सरल

जय जोहार…. बस संचालक ह अब घर बइठे शादी, पिकनिक, मेला अउ तीर्थयात्रा समेत विशेष कार्य बर जारी किये जवइया स्पेशल परमिट ल आनलाइन प्राप्त कर सकही। सीएम के निर्देश म राज्य सरकार के तरफ ले बस संचालक मन ल सुविधा दे बर स्पेशल परमिट ल पुरा आनलाइन करे जावत हे।

बस संचालक मन ल शादी, पिकनिक, मेला अउ तीर्थयात्रा आदि विशेष कार्य बर अस्थायी रूप ले परमिट ले बर पड़त हे। अब आनलाइन प्रक्रिया ले अस्थायी परमिट बर बस संचालक मन ल परिवहन कार्यालय के चक्कर नई लगाय ल पड़ही। अस्थायी परमिट ह अब घर बइठे आसानी ले प्राप्त हो सकही।
बता देन कि वर्तमान म विवाह, पिकनिक, मेला अउ तीर्थयात्रा जाय बर स्पेशल परमिट ह जारी होवत हे। परिवहन विभाग के तरफ ले ए पूरा प्रक्रिया ल सरल करत हुये एला आनलाइन करे जावत हे।

बस संचालक ह परिवहन विभाग के वेबसाइट www.parivahan.gov.in म जा के खुद फार्म भर के स्पेशल परमिट ल ले सकही। बस संचालक मन के तरफ ले स्पेशल परमिट के आवेदन ल ले के परमिट बर टैक्स अउ फीस पटाय के सुविधा ह घलो आनलाइन उपलब्ध रही।

आवेदन के बाद परमिट ह स्वत अनुमोदित घलो हो जाही। जेला बस संचालक मन ह डाउनलोड घलो कर सकत हे।