मुख्यमंत्री भूपेश बघेल ह आज करही ऑक्सीजोन के शुभारंभ

जय जोहार…. मुख्यमंत्री भूपेश बघेल ह राजधानी रायपुर म आज दोपहर 12 बजे ऑक्सीजोन के शुभारंभ करही। एखर प्रथम चरण म 12 एकड़ म अभी तक चार करोड़ रूपिया ले 75 प्रजाति के चार हजार ले जियादा पेड़ अउ पौधा लगाय गे हे।

एमा आम, जामुन, सीताफल, आंवला अउ अमरूद जइसे फलदार वृक्ष अउ तितली ल आकर्षित करे बर अमलतास, कचनार, मौलश्री अउ आकाशनीम जइसे पौधा ल शामिल करे गे हे। संगेसंग ऑक्सीजोन म 503 पुराना वृक्ष ल संरक्षित करे गे हे।
इहां पार्किंग पाथवे, वाटर बॉडी म अवइया पेड़ ल घलो नई काटे गे हे। ऑक्सीजोन म तीन किलोमीटर ले जियादा लम्बाई म पाथवे अउ पंगडंडी ल तैयार करे गे हे।

एखर आलावा इहां दू वाटर बॉडी हे, जेमा ले एक प्राकृतिक, त दूसर ल निर्मित करे गे हे। वर्षा के सब्बो पानी ह चैनल ले बांध के एमा इकट्ठा होवत हे, एखर ले पौधा के सिंचाई करे जावत हे।