छत्तीसगढ़ ह लघु वनोपज के संग्रहण म देश म अव्वल नम्बर म

जय जोहार…. देश म चालू सीजन के दौरान वनोपज के संग्रहण मामले म छत्तीसगढ़ ह सरलघा पहले नम्बर म बने हुये हे।

छत्तीसगढ़ म पिछिले छह महिना म 104 करोड़ रूपिया के लगभग डेढ़ लाख क्विंटल लघु वनोपज के संग्रहण हो चुके हे।

अइसने छत्तीसगढ़ म 100 करोड़ रूपिया ले जियादा लघु वनोपज के वार्षिक संग्रहण लक्ष्य ल छह महिना पहिले हासिल कर ले गे हे, जेन राज्य बर एक उपलब्धि हे।
वन मंत्री मोहम्मद अकबर ह बताइस कि वनवासी ग्रामीण मन के हित ल धियान म रखत हुये खरीदी जवइया लघु वनोपज के संख्या ल बढ़ा के अब 31 कर दे गे हे।

एखर पहिले प्रेदश म 2015 ले 2018 तक सिरिफ सात वनोपज के समर्थन मूल्य म खरीदी करे जावत रिहिस।

ए संबंध म प्रधान मुख्य वन संरक्षक राकेश चतुर्वेदी ह बताइस कि राज्य ह चालू वर्ष म न्यूनतम समर्थन मूल्य योजना के तहत संग्रहित लघु वनोपज म इमली, पुवाड़, महुआ फूल, बहेड़ा, हर्रा, कालमेघ, धवई फूल, नागरमोथा, इमली फूल, करंज बीज अउ शहद ह शामिल हे।

एखर आलावा बेल गुदा, आंवला, रंगीनी लाख, कुसुमी लाख, फुल झाडु, चिरौंजी गुठली, कुल्लू गोंद, महुआ बीज, कौंच बीज, जामुन बीज, बायबडिंग, साल बीज, गिलोय अउ भेलवा लघु वनोपज घलो एमा शामिल हे।