corona: राजधानी के बड़का अस्पताल म कोराना के प्रवेश, तीन कोरोना संक्रमित के होइस पुष्टि

जय जोहार…. छत्तीसगढ़ म कोरोना (corona) संक्रमित मरीज मन के संख्या ह सरलघा बाढ़त जावत हे। बुधवार के राजधानी के डीकेएस अस्पताल म घलो कोरोना के प्रवेश हो गे हे।

इहां तीन कोरोना पाजिटिव के पुष्टि होय हे। तीनों मरीज ह दूसर जिला के रहवइया हे। तीनों के कुछु दिन ले डीकेएस म इलाज चलत हे।
स्वास्थ्य विभाग ले मिले जानकारी के अनुसार कोरोना (corona) संक्रमित मरीज मन ह गरियाबन्द, दुर्ग अउ रायगढ़ के निवासी हे।

लक्षण के आधार म सैम्पल जांच बर भेजे गे रिहिस। जेन रिपोर्ट ह पाजिटिव आय हे। बता देन कि रायपुर म आज 12 कोरोना संक्रमित मरीज मन ह मिले हे।
बता देन कि एखर पहिली रायपुर म नौ कोरोना (corona) पाजिटिव मरीज मिले हे, ओमा सिमरन सिटी मठपुरैना ले एक, बेबीलोन होटल ले 2 कर्मचारी, फूल चौक बिरगांव, अभनपुर बेंद्री अउ श्रीनगर ले एक-एक अउ शहरी क्षेत्र ले तीन मरीज ह शामिल हे।
बता देन कि राजधानी म कोरोना संक्रमित कुल मरीज मन के संख्या ह बाढ़ के 504 हो गे हे। जबकि सक्रिय मामले ह 271 पहुंच गे हे।

ऊहचे 233 लोगन मन ह बने होय के बाद अपने घर लहुट चुके हे। ए वायरस ले राजधानी म अब तक दू लोगन मन के मौत हो गे हे।