Corona: कांसा क्वारेंटाइन सेन्टर म फेर दू कोरोना मरीज के होइस पहचान, दुनो ह चेन्नई ले लहुटे रिहिस
जय जोहार…. जांजगीर-चांपा जिला के तहसील डभरा के ग्राम कांसा क्वारेंटाइन सेन्टर म दू लोगन मन ह कोरोना (corona) पाजिटिव मिले हे। जेन ह कुछु दिन पहिले चेन्नई ले लहुटे रिहिस।
जानकारी के अनुसार ग्राम कांसा के शासकीय प्राथमिक शाला म क्वारेंटाइन 40 लोगन मन के संग मीरोनी स्कूल के पांच लईका मन के सैम्पल ल कोरोना (corona) जांच बर भेजे गे रिहिस।
जेमा ले दू लोगन मन के रिपोर्ट ह पाटिजिव आय हे। कोरोना पाजिटिव मरीज मिले के जानकारी के बाद स्वास्थ्य विभाग क अधिकारी मन ह कांसा क्वारेंटाइन सेन्टर पहुंच गे हे अउ संक्रमित मन ल रायपुर भेजे के तैयारी ल करत हे।
बता देन कि कुछु दिन पूर्व चेन्नई ले दू बस म सब्बो लड़की मन ह डभरा पहुंचे रिहिस, जे मन ल कांसा स्कूल म क्वारेंटाइन सेन्टर म रखे गे रिहिस।
सब्बो ह चेन्नई म सिलाई अउ कढ़ाई के काम ल करे बर गे रिहिस, ओखर संग 2 लईका घलो गे रिहिस, जेखर कुछु दिन पहिले रिपोर्ट ह कोरोना (corona) पाजिटिव आय हे।
ओ मन ल शासकीय प्राथमिक शाला कांसा के क्वारेंटाइन सेन्टर म रखे गे रिहिस। आज फेर दू लोगन मन के रिपोर्ट ह पाजिटिव आय हे।
