Corona: छत्तीसगढ़ म फेर कोरोना के 184 नवा मरीज के होइस पुष्टि, राजधानी म सबले जादा 87 संक्रमित
जय जोहार…. छत्तीसगढ़ म कोरोना (corona) संक्रमित मरीज मन के संख्या ह कम होय के नाम नई लेवत हे। राज्य म सोमवार के कोरोना के 184 नवा मामले के पहचान होय हे।
उहचे 49 मरीज मन ह कोरोना (corona) ले जंग जीत गे हे, जेखर बाद ओ मन ल अस्पताल ले डिस्चार्ज कर दे गे हे।
राज्य कोरोना कन्ट्रोल एंड कमान्ड सेन्टर ले मिले जानकारी के मुताबिक रायपुर ले 87, राजनांदगांव ले 26 दुर्ग ले 25, मुंगेली ले 9, गरियाबन्द ले 8, धमतरी ले 7, बेमेतरा, कबीरधाम ले 4-4, बिलासपुर ले 3, बलौदाबाजार ले 2, बालोद, महासमुंद, रायगढ़, जांजगीर-चांपा, सरगुजा, कोरिया, जशपुर, नारायणपुर, गौरेला-पेंड्रा-मरवाही ले एक-एक मरीज मिले हे।
सब्बो संक्रमित मन ल अस्पताल म भर्ती करे के प्रक्रिया ह चलत हे। बता देन कि प्रदेश म कोरोना (corona) संक्रमित मरीज मन के कुल संख्या ह 4265 हो गे हे। जेमा ले सक्रिय मामले ह 1044 हे।
उहचे 3202 मरीज मन ह बने होय के बाद अपन घर लहुट चुके हे। ए वायरस ले प्रदेश म अब तक 19 लोगन मन के मौत हो गे हे।