mahasamund : डेढ़ करोड़ रूपिया के नशीला पदार्थ के संग तस्कर ल पुलिस ह करिन गिरफ्तार

जय जोहार…. डेढ़ करोड़ रूपिया के ब्राउन शुगर ल हॉर्लिक्स के डिब्बा म डाल के बेचे बर जावत तस्कर ल गिरफ्तार करे म महासमुंद (mahasamund) पुलिस ल सफलता मिले हे।

आरोपी ले नशीला पदार्थ के अलावा एक पिस्टल, 2 मैग्जीन अउ 2 जिंदा कारतूस घलो बरामद करे गे हे।

जानकारी के मुताबिक मुखबिर ले सूचना मिले के आधार म एक व्यक्ति ह नदी मोड़ ले महासमुंद (mahasamund) के ओर मोपेड गाड़ी म ब्राउन शुगर अउ पिस्टल रखे बेचे बर ग्राहक के तलाश म आवत हे।

एखर बाद सायबर सेल अउ सिटी कोतवाली टीम ह नाकेबंदी करिस, नाकेबंदी ल देख के व्यक्ति ह भागे ल लगिस। संदेह के आधार म पुलिस ने व्यक्ति ल पकड़ के पूछताछ करिस,
जेमा ओ हा अपन नाम शंकरलाल वैष्णव निवासी कासीराम नगर तेलीबांधा रायपुर अउ मूल निवासी जोधपुर, राजस्थान बतइस हे। (mahasamund) पुलिस ने युवक के तलाशी लिस, त ओखर पास एक ओटोमैटिक पस्टिल, 2 मैग्जीन अउ 2 कारतूस मिलिस।
संगेसंग जेब ले 50 ग्राम ब्राउन शुगर घलो मिलिस। उहचे गाड़ी के डिक्की ले हॉलिक्टस के डिब्बा ले 550 ग्राम ब्राउन शुगर अउ दूसर प्लास्टिक डिब्बा ले 180 ग्राम ब्राउन शुगर मिले हे।
आरोपी के पास ले कुल 1 करोड़ 46 लाख रूपिया कीमत के ब्राउन शुगर ल जब्त करे गिस।