जय जोहार…. धमतरी जिला म कोरोना (corona) संक्रमण के मामला ह कम होय के नाम नई लेवत हे। आज जिला म कोरोना के 48 नवा मरीज मिले हे। उहचे इलाज के दौरान दू लोगन मन के मउत हो गे हे।
मिले जानकारी के मुताबिक जिला म आज जेन कोरोना (corona) के नवा मरीज के पहचान होय हे, ओमा नगरी ब्लाक ले 34 संक्रमित मिले हे, जेमा सीआरपीएफ कैंप ले तीन, सालोनी ले पांच अऊ नगरी नगर पंचायत ले 14 लोगन मन ह शामिल हे। मगरलोड ले सात अऊ कुरुद ब्लाक से 3 संक्रमित मिले हे।
मरीज मन के पुष्टि करत हुये सर्विलांस अधिकारी डॉ विजय फूलमाली ह बताइस कि बुधवार के कोरोना (corona) वायरस ले दू मरीज मन के मउत हो गे हे। जेमा ले एक विवेकानंद नगर निवासी बुजुर्ग के इलाज रायपुर के एक निजी अस्पताल म चलत रहिस, आज बिहिनिया ओखर निधन हो गे। उहचे दूसर कोष्टापारा के 85 वर्ष के बुजुर्ग महिला के निधन हो गे, जेखर कोविड अस्पताल धमतरी म इलाज चलत रहिस।
