काबर छोडिस अमित जोगी ह मरवाही सीट ल …

रायपुर। छत्तीसगढ़ के पूरव मुख्यमंत्री अजीत जोगी ह विधानसभा म अपन चुनाव लड़े ल लेके बड़ा खुलासा करिस हे। अजीत जोगी के मुताबिक उमन ह मरवाही विधानसभा सीट ले चुनाई लड़ही। अजीत जोगी के ये ऐलान के बाद उंखर बेटा अउ विधायक अमित जोगी ह कहिन के वो ह ये दफा मरवाही के जनता अउ अजीत जोगी के बीच नइ आवय। आपमन ल बतादन के अजीत जोगी के मरवाही दूसर सीट होही। उमन ह पहिली ले राजनांदगांव ले चुनाइ लड़े के घोसना कर चुके हे।
अजीत जोगी ह जब सीएम रमन सिंह के क्षेत्र ले चुनाव लड़े के घोसना करे रहिस हे। जेखर रमन सिंह ह उंखर स्वागत करिन हे। रमन ह कहे रहिस हे के लोकतंत्र म कोनो ह कहूं ले चुनाइ लड़े के अधिकार हे। अजीत जोगी कहूं ले चुनाइ लड़ सकत हे। उमन ल पूरा आजादी हे।
एती अजित जोगी के पत्नी रेणु जोगी ह जोगी ल सलाह देय हे के उमन राजनांदगांव के बजाय मरवाही ले चुनाइ लड़य। ये बेहतर सीट हे काबर के उहां उंखर पैतृक घर जोगीसार हे। अइसन म कांग्रेस ह कहां चुप बइठतीस। कांग्रेस ह जोगी उपर तंज कसत हुए कहे रहिन हे के जोगी मुख्यमंत्री रमन सिंह के ट्रबल सूटर के तरज म उंखर खेलाफ चुनाइ अखाड़ा म उतरे के मंसा जाहिर करत हे। ये मामला म कांग्रेस ह अति आत्मविश्वास दिखत दावा करिस के जोगी भले ही मुख्यमंत्री रमन सिंह के मुसीबत कम करय, लेकिन राजनांदगांव ले कांग्रेस ह जीत दरज करही।