जय जोहार…. मुख्यमंत्री (cm) भूपेश बघेल ह उच्च न्यायालय के मुख्य न्यायाधीश पीआर रामचंद्र मेनन ल पत्र लिखे हे। ए पत्र म सीएम बघेल ह सबो जिला म यौन अपराध ले संबंधित प्रकरण के जल्दी सुनवाई बर आवश्यक संख्या म फास्ट ट्रैक कोर्ट अधिसूचित करे के अनुरोध करे हे। सीएम ह एखर बर राज्य सरकार के तरफ ले सबो आवश्यक सहयोग दे के सहमति दे हे।
सीएम (cm) बघेल ह पत्र म लिखे हे कि देश म महिला अऊ लईका मन के विरुद्ध यौन अपराध ह गंभीर चिंता के विषय हे। उक्त विषय म पर्याप्त कानून बने हे, लेकिन ओखर बावजूद उक्त प्रकार के अपराध म कमी होवत नई दिखत हे अऊ समय म न्याय नई मिलना घलो एक चिंता के विषय हे।
सीएम (cm) बघेल ह पत्र म लिखे हे कि ये उचित होही कि प्रदेश के सबो जिला म यौन अपराध ले संबंधित प्रकरण के सुनवाई बर आवश्यक संख्या म फास्ट ट्रैक कोर्ट अधिसूचित करे जाए, जेमा अईसे प्रकरण के सुनवाई समय सीमा अऊ दिन-प्रतिदिन हो। राज्य सरकार ह एखर बर सबो आवश्यक सहयोग बर सहमत हे। सीएम बघेल ह न्यायमूर्ति श्री मेनन ले ए विषय म आवश्यक निर्देश जारी करे के अनुरोध करे हे।
