Chhattisgarh: बिलासपुर ले दिल्ली बर 1 मार्च ले सुरू होवइया हे उड़ान सेवा, पढ़व

जय जोहार…. (Chhattisgarh) छत्तीसगढ़ के न्यायधानी बिलासपुर ले नईदिल्ली बर 1 मार्च ले उड़ान सेवा सुरू होवइया हे। बता देन कि सीएम भूपेश बघेल ह 4 फरवरी के अपन दिल्ली प्रवास के दौरान केंद्रीय विमानन मंत्री हरदीप सिंह पुरी ले मुलाकात करे रिहिन।

ए दौरान (Chhattisgarh) सीएम बघेल ह बिलासपुर ले दिल्ली, मुंबई अऊ कोलकाता जइसे महानगर ले एयर कनेक्टिविटी के अनुमति दे गे आग्रह करे रिहिन। जेमा केंद्रीय मंत्री पुरी ह बिलासपुर ले दिल्ली बर तुरंत एयर इंडिया के फ्लाइट सुरु करे के घोसना करे रिहिन।

बिलासपुर ले दिल्ली बर एटीआर 72 एयरक्राफ्ट के दू प्लाइट सोमवार, बुधवार, शुक्रवार अऊ सनिच्चर के संचालित करे जाही। (Chhattisgarh) पहिली फ्लाईट दिल्ली ले रवाना होके जबलपुर होवत हुये अपरान्ह 3.20 बजे बिलासपुर पहुंचही अऊ 3.45 बजे बिलासपुर ले प्रयागराज होवत हुये दिल्ली लहुटही। दूसर फ्लाईट ह दिल्ली ले प्रयागराज होवत हुये शाम 4 बजे बिलासपुर पहुंचही अऊ 4.30 बजे बिलासपुर ले जबलपुर होवत हुये दिल्ली जाही।