chhattisgarh : स्वच्छता प्रतियोगिता म छत्तीसगढ़ के सरलग तीसरइया बच्छर घलो उत्कृष्ट प्रदर्सन, 20 नवंबर के दिल्ली म करे जाही पुरस्कृत

जय जोहार…. (chhattisgarh)आजादी के 75वां वर्षगांठ म 20 नवंबर के नई दिल्ली के विज्ञान भवन म स्वच्छ अमृत महोत्सव म राष्ट्रपति रामनाथ कोविंद डहार ले छत्तीसगढ़ ल भारत के स्वच्छ राज्य के श्रेणी म पुरस्कृत करे जाही। भारत सरकार डहार ले आयोजित विश्व के सबले बड़का स्वच्छता प्रतियोगिता म छत्तीसगढ़ ह ए घांव घलो बाजी ल जीते हे।

एखर पहले बच्छर 2019 अउ 2020 म घलो छत्तीसगढ़ (chhattisgarh) स्वच्छता के मामला म अग्रणी राज्य रिहीन हे। भारत सरकार डहार ले केंद्रीय मंत्री हरदीप सिंह पुरी ह मुख्यमंत्री भूपेश बघेल अउ नगरीय प्रसासन मंत्री डॉ. शिवकुमार डहरिया ल पुरस्कार ग्रहण करे बर नई दिल्ली आमंत्रित करे गेहे।

भारत सरकार के आवासन अउ सहरी कार्यमंत्रालय डहार ले हरेक बच्छर देस के सबो सहर अउ राज्य के मध्य स्वच्छ सर्वेक्षण के आयोजन ल करे जात हे। एमा आने-आने मापदंड के अंतर्गत सहरी स्वच्छता के आंकलन करे जात हे। (chhattisgarh) मुख्य रूप ले घर-घर ले कचरा एकत्रीकरण, कचरा के वैज्ञानिक रीति ले निपटान, कचरा मुक्त सहर आदि के थर्ड पार्टी के माध्यम ले आँकलन करत हुये मनखे मन के फीडबैक ल घलो एमा सामिल करे जात हे। इही आधार म राज्य अउ सहर के रैंकिंग जारी कर उत्कृष्ट प्रदर्सन करइया राज्य अउ सहर ल पुरस्कृत करे जात हे।