Raipur : गीतकार डॉ. चम्पेश्वर गिरि गोस्वामी के छत्तीसगढ़ी गद्य संग्रह ‘अपन गोठ’ के होय हे विमोचन, पढ़व
जय जोहार। (Raipur ) रायपुर म गत दिन विश्व रेडियो दिवस’ के अवसर म एक ठीन कार्यक्रम के आयोजन करे गीस। एमा छत्तीसगढ़ के सुप्रसिद्ध कवि अउ गीतकार डॉ. चम्पेश्वर गिरि गोस्वामी के छत्तीसगढ़ी गद्य संग्रह ‘अपन गोठ’ के विमोचन करे गेहे।
अहिंसा रेडियो श्रोता संघ के अध्यक्ष व रेडियो पत्रिका डीएक्स अंजली के संपादक झावेंद्र कुमार ध्रुव ह बताइन कि कार्यक्रम के मुख्य अतिथि लखन लाल भौर्य, सहायक निदेशक (कार्यक्रम) आकाशवाणी रायपुर रिहीन। ए दउरान सेवानिवृत्त वरिष्ठ उद्घोषक श्याम वर्मा, वरिष्ठ उद्घोषक प्रकाश उदय, ओल्ड लिस्नर्स ग्रुप के संरक्षक लक्ष्मी नारायण लाहोटी, लिस्नर्स ग्रुप के प्रदेशाध्यक्ष मोहनलाल देवांगन व वरिष्ठ साहित्यकार छबिलाल सोनी उपस्थित रिहीन।
(Raipur) विमोचन कार्यक्रम के मंच संचालन ल आकाशवाणी रायपुर केंद्र म युववाणी कंपीयर के रूप म जुड़े पायल विशाल ह करीन। उहें आकाशवाणी रायपुर केंद्र के लोकप्रिय युववाणी कंपीयर शुभ्रा शुक्ला मिश्रा ह डॉ. चम्पेश्वर गिरि गोस्वामी के व्यक्तित्व व कृतित्व के संदर्भ म अपन अभिव्यक्ति ल साझा करीन।
छत्तीसगढ़ी गद्य संग्रह ‘अपन गोठ’ के विमोचन के बाद मंच म उपस्थित सबो अतिथि मन ह डॉ. चम्पेश्वर गिरि गोस्वामी ल ए पुस्तक बर बधाई दीन। अइसने छत्तीसगढ़ी साहित्य अउ छत्तीसगढ़ी गीत के माध्यम ले छत्तीसगढ़ माता की सेवा करत रहे के सुभकामना घलो दीन ।
बता देन कि डॉ. चम्पेश्वर गिरि गोस्वामी के अब तक आठ पुस्तक प्रकाशित हो गेहे। ओखर छत्तीसगढ़ी गद्य संग्रह ‘अपन गोठ’ नवमी कृति हे। एखर आलावा नाटक बटवारा, जमराज के नियाव, साहर के बेटी गांव के बहू अउ बाल काव्य नाटक – पीरा (छत्तीसगढ़ी) पर्यावरण म आधारित, एकाग्रचित्त (हिंदी) जइसे कई ठीन नाटक के लेखन कर चुके हे । उहें , प्रसारण अउ प्रकाशन के संदर्भ म आकाशवाणी अउ दूरदर्शन ले प्रसारण ( प्रसार भारती दिल्ली से वाणी प्रमाण पत्र), छत्तीसगढ़ी नाट्य कलाकार आकाशवाणी रायपुर, आकाशवाणी रायपुर ले लगभग दो हजार कविता के प्रसारण, पत्र-पत्रिकाओं म लेखन, स्तंभकार हे ।
