chhattisgarh के आकांक्षी अउ हाईबर्डन जिला म होही फोर्टिफाइड चावल के वितरण, पढ़व
जय जोहार। (chhattisgarh ) छत्तीसगढ़ के आकांक्षी अउ हाईबर्डन जिला म कुपोसण अउ एनीमिया जइसे समस्या ले निपटे बर राज्य सरकार ह महत्वपूर्ण निर्णय लेहे । राज्य सरकार डहार ले वित्तीय बच्छर 2022-23 म 10 ठीन आंकाक्षी और 2 ठीन हाईबर्डन जिला म मार्च 2022 ले सार्वजनिक वितरण प्रणाली के अंतर्गत राज्य योजना के राशनकार्डधारी परिवार मन ल फोर्टिफाइड चावल के वितरण करे जाही। राईस फोर्टिफिकेशन के शत-प्रतिशत खर्च ल राज्य सरकार डहार ले वहन करे जाही । ये निर्णय ल मुख्यमंत्री भूपेश बघेल के अध्यक्षता म आयोजित मंत्रिपरिसद के बइठक म करे गेहे ।
खाद्य विभाग ले मिले जानकारी के अनुसार सार्वजनिक वितरण प्रणाली म राज्य योजना के राशनकार्ड म चावल के सालाना आबंटन लगभग 3 लाख 89 हजार 486 टन हे । ए चावल के फोर्टिफिकेशन बर लगभग 28.43 करोड़ अउ राष्ट्रीय खाद्य सुरक्षा अधिनियम के हितग्राही मन ल फोर्टिफाइड चावल के वितरण बर राज्य सरकार डहार ले 11.16 करोड़ रुपिया व्यय करे जाही ।
फोर्टिफाइड चावल के वितरण ल राज्य के 10 ठीन आकांक्षी जिला कोरबा, राजनांदगांव, महासमुंद, कांकेर, नारायणपुर, दंतेवाड़ा, बीजापुर, बस्तर, कोण्डागांव, सुकमा अउ 2 हाईबर्डन जिला कबीरधाम अउ रायगढ़ म करे जाही । ए जिलों म राष्ट्रीय खाद्य सुरक्षा अधिनियम के राशनकार्ड के तरह ही राज्य योजना के राशनकार्ड म फोर्टिफाइड चावल के वितरण करे जाही।
