Durg म घलो वायरोलॉजी लैब होगे सुरू, स्वास्थ्य मंत्री टीएस सिंहदेव ह करीन ऑनलाइन लोकार्पण
जय जोहार। लोक स्वास्थ्य, परिवार कल्याण अउ चिकित्सा शिक्षा मंत्री टी.एस. सिंहदेव ह आज दुर्ग (Durg) म कोरोना सैंपल के आरटीपीसीआर जांच बर वायरोलॉजी लैब के ऑनलाइन सुभारंभ करीन। ए नवा लैब ल मिलाके अब प्रदेस के 12 सासकीय लैब म आरटीपीसीआर जांच के सुविधा हो गेहे। ऐखर ले हरेक दिन आरटीपीसीआर जांच के संख्या ह बाढ़े के साथ मनखे मन ल रिपोर्ट घलो जल्दीच मिले ल लगही।
दुर्ग (Durg) वायरोलॉजी लैब के वर्चुअल लोकार्पण कारीकरम म दुर्ग सहर के विधायक अरूण वोरा, स्वास्थ्य विभाग के प्रमुख सचिव डॉ. मनिन्दर कौर द्विवेदी, स्वास्थ्य सेवाओं के संचालक नीरज बंसोड़, राष्ट्रीय स्वास्थ्य मिशन के संचालक डॉ. प्रियंका शुक्ला, दुर्ग के कलेक्टर सर्वेश्वर भूरे, वायरोलॉजी लैब के राज्य नोडल अधिकारी डॉ. कमलेश जैन, एम्स रायपुर अउ रायपुर मेडिकल कॉलेज के माइक्रोबॉयोलॉजी विभाग के चिकित्सा विशेषज्ञ घलो ऑनलाइन सामिल होइन है।
स्वास्थ्य मंत्री टीएस सिंहदेव ह किहीन कि कोरोना के वास्तविक मामला के पुष्टि करे म आरटीपीसीआर जांच ह काफी अहम हे । ये सबले सटीक अउ भरोसामंद जांच हे । प्रदेस के सबो पुराना अउ नवा सरकारी मेडिकल कॉलेज अउ कोरिया जिला मुख्यालय बैकुंठपुर के बाद अब दुर्ग (Durg) म घलो आरटीपीसीआर जांच के सुविधा सुरू होय ले जादा सैंपल के जांच ल ए पद्धति ले करे जा सकही । ए नवा सुविधा ले कोरोना संक्रमित के पहचान अउ ओमन ल बेरा म उपचार उपलब्ध कराय म तेजी आही ।
