जय जोहार। सीएम भूपेश बघेल (CM Bhupesh Baghe) ह आज अपन निवास कार्यालय म अमर शहीद गैंदसिंह के शहादत दिवस म ओखर छायाचित्र म माल्यार्पण कर ओमन ल नमन करीन । सीएम श्री बघेल ह छत्तीसगढ़ म आजादी के बिगुल फूंकइया अमर शहीद गैंद सिंह ल याद करत हुए किहीन कि वोहा सन् 1857 म हुए देस के पहिला स्वतंत्रता संग्राम ले काफी पहिले ही अंग्रेज के गुलामी अउ शोषण के विरूद्ध आवाज उठाए रिहीन ।
मुख्यमंत्री श्री बघेल ह किहीन कि बस्तर के अबूझमाड़िया भाई-बहिनी के अधिकार बर संघर्ष करइया नेतृत्वकर्ता जमींदार गैंदसिंह ल 20 जनवरी सन् 1825 के परलकोट के महल के सामने फांसी दे गे रिहीन । अपन स्वाभिमान अउ मातृभूमि के रक्षा बर गैंदसिंह शहीद हो गे । परलकोट के मुक्ति आंदोलन के नायक गैंदसिंह जी के देस प्रेम अउ मातृभूमि के मुक्ति बर अदम्य शौर्य अउ बलिदान ल हमेसा याद करे जाही। ए अवसर म गृह मंत्री ताम्रध्वज साहू, कृषि मंत्री रविंद्र चौबे, संसदीय सचिव विकास उपाध्याय, विधायक खेलसाय सिंह, मुख्यमंत्री के सलाहकार राजेश तिवारी उपस्थित रिहीन ।
