chhattisgarh : मक्का प्रोसेसिंग प्लांट ले बदलही किसान मन के तकदीर, कोण्डागांव के कोकोड़ी म 140 करोड़ के लागत ले बनत हे प्लांट
जय जोहार। छत्तीसगढ़ (chhattisgarh)के कोण्डागांव जिला म 140 करोड़ रुपिया लागत ले बनत मक्का प्रोसेसिंग प्लांट किसान मन के तकदीर संवारही। राज्य सरकार के सहयोग ले सहकारिता के क्षेत्र म ये पहिला प्लांट कोण्डागांव जिला म एखर सेती स्थापित करे जात हे कि छत्तीसगढ़ राज्य म कोण्डागांव जिला म मक्का के सबले जादा उत्पादन होत हे । ए प्लांट के लग जाय ले किसान मन ल मक्का के जादा मूल्य मिले के उम्मीद हे।
प्रोसेसिंग प्लांट के निर्माण के लगभग 35 फीसद काम पूरा हो गेहे। ये प्लांट कोण्डागांव म ही नई बल्कि छत्तीसगढ़ के किसान मन बर फायदेमंद साबित होही । जिला प्रशासन डहार ले एला जून 2023 तक पूरा करे के लक्ष्य रखे गेहे । गौरतलब हे कि मुख्यमंत्री भूपेश बघेल के मंसा के अनुरूप छत्तीसगढ़ सरकार के उद्योग नीति म कृषि अउ वनोपज आधारित उद्योग के स्थापना ल विसेस प्राथमिकता श्रेणी म रखे गेहे।
कोण्डागांव जिला के कलेक्टर दीपक सोनी के पहल म मक्का प्रोसेसिंग म शुक्रवार के स्थानीय जनप्रतिनिधि, पत्रकार, ग्रामीण अउ अधिकारी-कर्मचारी मन ह श्रमदान करीन । कलेक्टर दीपक सोनी ह किहीन कि राज्य सासन के परिकल्पना के अनुरूप मुख्यमंत्री भूपेश बघेल के निर्देस के अनुसार ए मक्का प्रसंस्करण प्लांट ल अवइया जून 2023 तक पूरा करे बर जिला प्रसासन ह कटिबद्ध होके पहल करत हे।
