जय जोहार। सीएम भूपेश बघेल (CM Bhupesh Baghel) ह रायपुर के साइंस कॉलेज मैदान म आज बिहनिया 11 बजे राज्य स्तरीय युवा महोत्सव 2022-23 के सुभारंभ करही। महोत्सव के आयोजन ल खेल अउ युवा कल्याण विभाग के डहार ले करे जात हे। उद्घाटन कार्यक्रम में अति विशिष्ट अतिथिम के रूप म छत्तीसगढ़ विधानसभा के अध्यक्ष डॉ. चरणदास महंत ह सामिल होही। कार्यक्रम के अध्यक्षता खेल अउ युवा कल्याण विभाग के मंत्री उमेश पटेल करही।
युवा महोत्सव म छत्तीसगढ़िया खेल फुगड़ी, भौंरा अउ गेड़ी दौड़ के स्पर्धाएं होही। संगेसंग छत्तीसगढ़ी लोक गीत अउ लोक नृत्य करमा, राउत नाचा, पंथी, सरहुल, सुवा, बस्तरिया नृत्य के प्रस्तुति घलो राज्य स्तरीय युवा महोत्सव म देखे ल मिलही। महोत्सव म छत्तीसगढ़ी संस्कृति ले संबंधित चित्रकला, छत्तीसगढ़ के पारंपरिक वेशभूषा अउ व्यंजन के फूड फेस्टिवल के आयोजन होही । सीएम भूपेश बघेल के नेतृत्व म खेल अउ युवा कल्याण विभाग डहार ले 28 जनवरी ले तीन दिनी राज्य स्तरीय युवा महोत्सव के आयोजन करे जात हे । महोत्सव म प्रदेस भर के 3 हजार प्रतिभागी हिस्सा लेही ।
महोत्सव के पहिली दिन आज राजधानी रायपुर के साइंस कॉलेज मैदान अउ पंडित दीनदयाल उपाध्याय ऑडिटोरियम म लोकगीत, तात्कालिक भाषण, शास्त्रीय संगीत हिन्दुस्तानी अउ कर्नाटका संगीत, तबला, गिटार वादन के प्रतियोगिता होही। संगेसंग निबंध, चित्रकला, खो-खो महिला अउ पुरुष, कबड्डी महिला अउ पुरुष, कुश्ती महिला अउ पुरुष वर्ग के प्रतियोगिता होही ।
