जय जोहार। ( Haat-Bazar Clinic) छत्तीसगढ़ के वनांचल अउ ग्रामीण इलाका के हाट-बाजार म स्वास्थ्य विभाग के मेडिकल टीम डहार ले अब तक 81 लाख 89 हजार 806 मनखे मन ल इलाज मुहैया कराए गेहे। मुख्यमंत्री हाट-बाजार क्लीनिक योजना के माध्यम ले प्रदेस के 1749 हाट-बाजार म क्लीनिक लगाके मनखे मन के मुफत जांच अउ उपचार कर दवाई दे जात हे।
स्वास्थ्य विभाग डहार ले योजना के सुरुवात के बाद ले अब तक प्रदेस भर म एक लाख 44 हजार 962 हाट-बाजार क्लीनिक आयोजित कर स्वास्थ्य सेवा उपलब्ध कराए गेहे । योजना के अंतर्गत राज्य म 429 डेडिकेटेड ब्राडिंग वाहन अउ चिकित्सा दल के माध्यम ले दूरस्थ अंचल म मनखे मन के इलाज करे जावत हे ।
हाट-बाजार क्लीनिक म जरूरतमंद ल मुफत उपचार, चिकित्सकीय परामर्श अउ दवाई उपलब्ध कराय के संग ही मोबाइल मेडिकल यूनिट डहार ले मलेरिया, एचआईव्ही, मधुमेह, एनीमिया, टीबी, कुष्ठ रोग, उच्च रक्तचाप अउ नेत्र विकार के जांच घलो करे जात हे । ए क्लीनिक म शिशु अउ गर्भवती महिला मन के टीकाकरण घलो करे जावत हे । हाट-बाजार क्लीनिक म ओ.पी.डी. आधारित आठ ठीन सेवा उपलब्ध कराए जावत हे । जांच के बाद मनखे मन ल मुफत दवाई घलो दे जात हे।
Other Articles
