chhattisgarh : उस्मानाबादी ब्रीड ले बढ़ेही किसान मन के आमदनी, पशुपालन विभाग ह उन्नत नस्ल के बकरी पालन ल देवत हे बढ़ावा
जय जोहार। छत्तीसगढ़ (chhattisgarh ) के गौठान ल रोजगार गुड़ी (रीपा) के दर्जा मिले के इंहा नवा-नवा उद्यम के सुरुवात करे जावत हे । अब ए कड़ी म एक ठीन नवा उपलब्धि घलो जुड़इया हे। दुर्ग जिला के गौठान म राज्य के पहिला बकरी प्रजनन उप-केन्द्र स्थापित करे गेहे । इंहा उस्मानाबादी बकरा के उत्पादन अउ प्रजनन घलो गौठान म होही । जिला प्रशासन अउ कामधेनु विश्वविद्यालय मिल के ए नवा पहल ल अंजाम देवत हे ।
मुख्यमंत्री भूपेश बघेल के मंशा के अनुरूप किसान मन के आय ल बढ़ाय अउ ओमन ल कृषि अउ ओखर सहायक गतिविधि ले जोड़े के काम करे जावत हे । दुर्ग जिला म उस्मानाबादी बकरा के पालन के फले -फूले के संभावना ल देखत हुए गौठान म पालन बर पहल करे जावत हे। गौरतलब हे कि राज्य म 4 लाख पशुपालक बकरी पालन ले जुड़े हे । ए काम ल पशुपालन विभाग ह बढ़ाय बर उन्नत नस्ल के बकरी पालन बर नवा -नवा सुविधा दे के काम करत हे ।
दुर्ग जिला म उन्नत नस्ल के बकरी के पालन ल बढ़ावा दे बर कामधेनु विश्वविद्यालय म उस्मानाबादी नस्ल बर प्रजनन केन्द्र बनाए गेहे । ग्रामीण क्षेत्र म ए नस्ल के लोकप्रियता ल बढ़ाय बर कुर्मीगुंडरा गौठान म प्रजनन उपकेन्द्र बनाए गेहे । इंहा उस्मानाबादी 25 बकरी अउ 2 बकरा के एक यूनिट के पहली खेप भेजे गेहे । इंहा गौठान समिति ह बकरी के प्रजनन के काम काज सीखे के संग ही एखर पालन के काम घलो करही। ए काम म विश्व विद्यालय के संग पशुपालन विभाग तकनीकी सहायता देही ।
