CM Bhupesh Baghel ह करीन बड़का घोसना, माता बहादुर कलारिन जयंती म अब मिलही एच्छिक अवकाश अउ राज्य म बनही महुआ बोर्ड, पढ़व
जय जोहार। मुख्यमंत्री भूपेश बघेल (CM Bhupesh Baghel) ह छत्तीसगढ़ कलार महासभा डहार ले रायपुर के साइंस कालेज मैदान म आयोजित कलार महासम्मेलन म बड़का घोसना करे हे। वोहा किहीन कि छत्तीसगढ़ म महुआ बोर्ड के स्थापना करे जाही । कलार समाज के माता बहादुर कलारिन के जयंती म एच्छिक अवकाश के प्रावधान करे जाय के घोसना करीन हे ।
सीएम ह किहीन कि उद्योग व्यापार म कलार समाज ल कोनो नकार नई सकत हे , लेकिन बगैर शिक्षा के कोनो घलो समाज हों, आगू नई बढ़ सकत हे । हरेक समाज बर शिक्षा जरूरी हे अउ जेहा घलो शिक्षा ले नाता तोड़े हे, वो समाज ह पिछड़ गेहे । हरेक समाज के इकाई व्यक्ति होत हे अउ राज्य सरकार ह पिछले चार बछर म व्यक्ति ल ही केंद्र में रखके योजना ल सुरू करे हे ताकि हरेक समाज के मनखे लाभांवित हो सके।
सीएम ह किहीन कि छत्तीसगढ़ म अलग अलग समाज के मनखे मिलजुल के रहत हे , जाति वैमनस्यता के इंहा कोनो जगह नई हे । वोहा किहीन कि छत्तीसगढ़ के मनखे मन के सामाजित ताना-बाना बेहद मजबूत हे अउ एखर ले छत्तीसगढ़ ल मजबूती मिलत हे ।
ए अवसर म संसदीय सचिव विकास उपाध्याय, विधायक मोहन मरकाम, विधायक विनय जायसवाल, विधायक संगीता सिन्हा, रायपुर महापौर ऐजाज ढेबर, रिसाली महापौर शशि सिन्हा, कलार महासभा छत्तीसगढ़ के अध्यक्ष दीपक सिन्हा, कलार महासम्मेलन संयोजक समिति के अध्यक्ष राजा जायसवाल उपस्थित रिहीन ।
