रायपुर एम्स म होईस श्रवण बाधित वर्षा के सफल सर्जरी, परिजन मन ह मुख्यमंत्री के जताईन अभार
मुख्यमंत्री भूपेश बघेल ह भेंट मुलाकात कार्यक्रम म प्रदेश के जम्मो विधानसभा के दौरा करे रिहिन। मनेंद्रगढ़ विधानसभा म भेंट मुलाकात के बेरा म तीसरी कक्षा म पढ़ईया आठ बछर के नोनी वर्षा मिश्रा ह घलो अपन परिजन मन संग संघरे रिहिन। मुख्यमंत्री ह वर्षा ल अपन तीर म बुलाके ओखर परिजन मन ले गोठबात करे रिहिन। वर्षा के पिता मुकेश मिश्रा ह मुख्यमंत्री ल जानकारी दे रिहिन कि ओखर बेटी श्रवण बाधित हे अऊ ओला इलाज के जरूरत हे। ए सुनके मुख्यमंत्री ह तुरते इलाज के निर्देश दे रिहिन।
हल्दीबाड़ी, चिरमिरी के रहवईया वर्षा के इलाज बर काक्लियर इम्प्लान्ट सर्जरी करे के जरूरत रिहिस। मुख्यमंत्री के निर्देश के बाद जिला प्रशासन ह अखिल भारतीय आयुर्विज्ञान संस्थान (एम्स) रायपुर म वर्षा ल भर्ती कराईस। ताहन एम्स के कुशल चिकित्सक मन के हाथ ले वर्षा के सफल काक्लियर इम्प्लान्ट सर्जरी करे गिस। ए सर्जरी के बाद अब वर्षा पूरा तरीके ले सुन पाही। वर्षा की सफल सर्जरी के बाद उंखर पिता मुकेश मिश्रा अऊ दूसर परिजन मन अपन खुशी ल व्यक्त करत मुख्यमंत्री ल धन्यवाद ज्ञापित करे हे।
