वनांचल के माई लोगिन मन घलो अपन मनपसंद स्व-रोजगार ले जुड़के आर्थिक लाभ कमावत हे। जशपुर जिला के घोलेंग स्व-सहायता समूह के महिला मन मऊहा ले स्वादिष्ट लड्डू तैयार कर ओला ऑनलाईन बेचत घलो हे। महिला मन के हाथ ले स्वादिष्ट आरोग्य महुआ लड्डू घर बईठे vedicvatica.org अऊ amazon.in ले ऑनलाईन प्राप्त कर सकथन। लईका मन बर बड़ गुणकारी हे ए लाड़ू अऊ ए ह कुपोषण ले लड़े म घलो फायदेमंद हे।
छत्तीसगढ़ सरकार कोती ले ग्रामीण अर्थव्यवस्था ल मजबूती दे बर गांव-गांव म महात्मा गांधी ग्रामीण औद्योगिक पार्क (रीपा) के सुरुआत करे गे हे। जशपुर म मऊहा, चार, चिरौंजी, साल-सागौन अऊ दूसर वन सम्पदा भरपूर मात्रा म पाए जाथे। पहिली मऊहा ल शराब बनाए म बऊरे जाए, फेर अब एखर ले स्वादिष्ट लड्डू, कुकीज, बिस्कीट अऊ दूसर खाद्य साम्रगी तैयार करे जावत हे। जेन ह सेहत बर बड़ फायदेमंद हे। जशपुर म तियार होवईया मऊहा लड्डू के खासियत हे कि ए आरोग्य मऊहा लाड़ू, जंगली मऊहा फूल, देशी घी अऊ गुड़, गोंद के संगे अश्वगंधा ले तियार करे गे हे। एक पैकेट म 15 नग महुआ पैकिंग करे जावत हे जेन ह शुगर फ्री होथे। एखर मूल्य 255 रुपिया निर्धारित करे गे हे।
युवा वैज्ञानिक समर्थ जैन ह बताईन कि मऊहा के लड्डू के कतको फायदा हे। एमा आयरन, कैल्शियम, पोटेशियम, मैंगनीज, जिंक, कोबाल्ट जईसे सूक्ष्म पोषक तत्व के समृद्ध स्रोत हे। ए ह रक्त म ग्लूकोज के अचानक वृद्धि ल रोके म मदद करथे।
