साय सरकार के 6 महीना के रिपोर्ट कार्ड

गारंटी अऊ सुसासन के ट्रेक म होवत हे सांय-सांय विकास

किसानहा, माई लोगिन अऊ युवा मन बर कई उदिम ले संवरत हे जिनगी

मुख्यमंत्री विष्णु देव साय के नेतृत्व म गारंटी अऊ सुसासन के ट्रेक म छत्तीसगढ़ सरपट दऊड़त हे। पाछू के 6 महीना म नजर डाले जाए त साय सरकार ह किसनहा, माईलोगिन अऊ युवा मन बर कई उदिम करे हे जेखर ले प्रदेश म विकास के पहिया घुमे ल लाग गे हे। अतका कम बेरा म सरकार ह जेन-जेन फईसला ले हे ओखर ले लोगन मन म अवईया बेरा के विकास बर आस बढ़ गे हे। प्रधानमंत्री नरेन्द्र मोदी के विकसित भारत के संकल्प ल पुरोए बर बछर 2047 तक विकसित छत्तीसगढ़ के निर्माण के लक्ष्य ल ध्यान म रखत विजन डाक्यूमेंट तैयार करे के उदिम घलो शुरू हो गे हे।

विधानसभा चुनई के बेरा म छत्तीसगढ़ के लोगन मन ल गारंटी दे गे रिहिन कि इहां के लोगन मन के जिनगी म खुसहाली अऊ समृद्धि बर सुसासन के उदिम करे जाही। इही ल धियान म रखत छत्तीसगढ़ सरकार ह एक अलग ले सुसासन अऊ अभिसरण विभाग के गठन करे रिहिस। ए विभाग कल्याणकारी नीति मन के सफल क्रियान्वयन, उपलब्ध संसाधन मन के उपयोग अऊ जन समस्या के त्वरित निराकरण बर बुता करत हे। जम्मो विभाग ल सुसासन बर सबले जादा सूचना प्रौद्योगिकी (आईटी) के इस्तेमाल करे बर निरदेस दे गे हे। राज्य सरकार के महत्वाकांक्षी योजना मन के निगरानी अऊ समीक्छा करे बर पूर्व प्रधानमंत्री भारत रत्न स्व. अटल बिहारी वाजपेयी के जन्मदिन 25 दिसंबर 2023, सुसासन दिवस म अटल मॉनिटरिंग पोर्टल के सुभारंभ करे गे रिहिस।

साय सरकार ह आवासहीन अऊ जरूरतमंद 18 लाख परिवार मन बर प्रधानमंत्री आवास के स्वीकृति दिन, 13 लाख ले जादा किसनहा मनखे मन ल धान की बोनस राशि 3100 रुपिया प्रति क्विंटल के दर ले खरीदिन अऊ 21 क्विंटल प्रति एकड़ के मान ले धान खरीदी, महतारी वंदन योजना म 70 लाख ले जादा गरीब परिवार के माई लोगिन मन ल हर महीना एक-एक हजार रुपिया दे जईसे कई निर्णय के क्रियान्वयन करिन। राज्य म नक्सल प्रभावित क्षेत्र म माओवाद उन्मूलन बर तेजी ले बुता करे जात हे। ए क्षेत्र मन म लोगन मन ल बेहतर सुविधाएं उपलब्ध कराए बर नियद नेल्लानार योजना शुरू करे गे हे। महतारी वंदन योजना, कृषक उन्नति योजना, रामलला दर्शन योजना, उद्यम क्रांति योजना जईसे कई अभिनव उदिम मन के शुरूआत करे गे हे। लोकतंत्र सेनानी (मीसा बंदी) मन के सम्मान निधि दे के उदिम ल फेर शुरू कर दे गिस।

मुख्यमंत्री विष्णु देव साय 13 जून ले जम्मो विभाग म प्रशासनिक कसावट लाए बर समीक्षा बैठक ले के सिलसिला घलो शुरू कर दे हे। ओमन अधिकारी मन ल कहे हे कि जन कल्याणकारी कार्यक्रम के क्रियान्वयन, पारदर्शिता अऊ जवाबदेही ल सबले बड़े प्राथमिकता म रखे। ओमन प्रशासनिक अधिकारी मन ल कहे हे कि आम मनखे मन के जम्मो समस्या ल दूर करे बर संवेदनशील होके बुता म लग जाए। लोकसभा चुनई के बाद अब शासन के योजना मन ल आम मनखे मन तक पहुंचाए बर छत्तीसगढ़ सरकार तेजी ले बुता करत हे। दीनदयाल उपाध्याय भूमिहीन कृषि मजदूर योजना जईसन कई उदिम के क्रियान्वयन बर तैयारी शुरू कर दे गे हे। राजस्व प्रशासन ल घलो मजबूत करे जावत हे। भूमि संबंधी विवाद अऊ ओखर समस्या ल दूर करे बर भू-नक्शा मन के जियो रिफरेसिंग म घलो फोकस करे जात हे।

18 लाख आवास स्वीकृत

मुख्यमंत्री विष्णु देव साय के सरकार बने के दूसरवां दिन कैबिनेट के बैठक आयोजित करके प्रधानमंत्री नरेन्द्र मोदी के गारंटी सकार करे बर 18 लाख 12 हजार 743 जरूरतमंद परिवार मन ल प्रधानमंत्री आवास उपलब्ध कराए बर स्वीकृति दे दे गे रिहिन। एखर बर 12 हजार 168 करोड़ रुपिया के बजट प्रावधान करे गे हे।

13 लाख किसान ल धान का बोनस

मोदी ह प्रदेश के किसानहा मन ल गारंटी दे रिहिन के उंखर सरकार बने के बाद इहां के किसान मन ल 2 बछर के बकाया धान बोनस के भुगतान करे जाही। पूर्व प्रधानमंत्री भारत रत्न स्वर्गीय अटल बिहारी वाजपेयी के जनम दिन (सुसासन दिवस) म छत्तीसगढ़ सरकार ह 13 लाख किसान मन के बैंक खाता म 3716 करोड़ रुपिया के बकाया धान बोनस के भुगतान कर ए गारंटी ल पूरा कर दिस।

3100 रुपिया म धान के खरीदी

साय सरकार ह 3100 रुपिया प्रति क्विंटल के दर ले 21 क्विंटल प्रति एकड़ के मान ले धान खरीदे के गारंटी ल घलो पुरोत 32 हजार करोड़ रुपिया के समर्थन मूल्य के राशि के तत्काल भुगतान किसान मन ल करे हे। अऊ 12 जनवरी के दिन 24 लाख 75 हजार किसान मन ल कृषक उन्नति योजना कोती ले अंतर के राशि 13 हजार 320 करोड़ रुपिया दे गिन। ए बछर खरीफ सीजन म राज्य म 145 लाख मीटरिक टन धान के रिकॉर्ड खरीददारी होए हे।

70 लाख महिला शक्ति ल वंदन

महतारी वंदन योजना डाहर ले माई लोगिन मन के बैंक खाता म राशि अंतरण के शुभारंभ प्रधानमंत्री नरेंद्र मोदी ह वर्चुअल माध्यम ले 10 मार्च 2024 म करे रिहिन। ए योजना ले राज्य के पात्र माई लोगिन मन ल प्रति माह एक-एक हजार रुपिया के सहायता राशि दे जात हे। योजना के लाभ 70 लाख ले जादा महिला मन ल मिलत हे। अब तक ए योजना म पाछू के चार महीना ले राशि जारी करे जा चुके हे। पाछू के सरकार ह महिला स्व-सहायता समूह ले रेडी टू ईट के बुता ल छीन ले रिहिस फेर अब विष्णुदेव सरकार ह ए बुता ल फेर ओमन ल सौंप दे हे।

श्री रामलला दर्शन योजना

छत्तीसगढ़ के श्रद्धालु मन ल अयोध्या म विराजमान श्री रामलला के दरसन बर निःशुल्क आवागमन के सुविधा उपलब्ध कराए बर राज्य म श्री रामलला अयोध्या धाम दर्शन योजना संचालित करे गे हे। जेखर ले शासकीय व्यय म अब तक हजारों दर्शनार्थी श्री रामलला के दर्शन बर अयोध्या भेजे गे हे।   

तेन्दूपत्ता संग्रहण दर अब 5500 रुपिया

राज्य म तेंदूपत्ता संग्रहण पारिश्रमिक दर 4000 रुपिया प्रति मानक बोरा रिहिस जेन ल बढ़ाके अब 5500 रुपिया प्रति मानक बोरा करे गे हे। चालू तेंदूपत्ता सीजन ले ही 12 लाख 50 हजार तेंदूपत्ता संग्राहक मन ल ए योजना के लाभ मिलत हे। संग्राहक मन बर राज्य सरकार कोती ले चरण पादुका योजना घलो शुरू करे जाही, संगे संग ओमन ल बोनस के लाभ घलो दे जाही।

भर्ती म पांच बछर के छूट

युवा मन के हित ल धियान म रखत राज्य सरकार ह महत्वपूर्ण फैसला लेवत पुलिस विभाग के संगे-संग दूसर अलग-अलग विभाग के शासकीय भर्ती म युवा मन के निर्धारित उमर म 5 बछर के छूट दे के फैसला ले गे हे। अभ्यर्थी मन ल 31 दिसंबर 2028 तक आयु सीमा म 5 बछर के छूट के लाभ मिलही।

यूपीएससी जईसन पीएससी

यूपीएससी जईसन अब छत्तीसगढ़ म पीएससी परीक्षा ल घलो पारदर्शी बनाए बर यूपीएससी के पूर्व चेयरमेन प्रदीप कुमार जोशी के अध्यक्षता म आयोग के गठन कर दे गे हे। पीएससी घोटाला के जांच ल घलो सरकार ह सीबीआई ल सौंप दे हे।

पांच शक्तिपीठ के होही विकास

राज्य के 5 शक्तिपीठ मन के विकास बर बजट म 5 करोड़ रुपिया के प्रावधान करे जा चुके हे। ए शक्तिपीठ मन के विकास चारधाम के तर्ज म करे जाही जेखर बर 1000 किलोमीटर के परियोजना शुरू करे जाही।

घर-घर जल

ग्रामीण घर म नल ले जल के आपूर्ति सुनिश्चित करे बर जल जीवन मिशन कोती ले 4500 करोड़ रुपिया के प्रावधान करे गे हे।

युवा मन बर उद्यम क्रांति योजना

राज्य म युवा स्वरोजगार ल बढ़ावा दे बर उद्यम क्रांति योजना शुरू करत एखर बजट म घलो प्रावधान करे गे हे। ए योजना कोती ले युवा मन ल स्वरोजगार स्थापित करे बर 50 प्रतिशत सब्सिडी म ब्याज मुक्त ऋण दे के व्यवस्था करे गे हे।

अधोसंरचना और कनेक्टीविटी पर जोर

राज्य म सड़क, रेल अऊ हवाई यातायात के सुविधा के विस्तार के बुता घलो शुरू हो गे हे। बिलासपुर अऊ जगदलपुर ले नवा उड़ान शुरू हो गे हे। जशपुर अऊ बलरामपुर हवाई पट्टी के विस्तार बर बजट म प्रावधान करे गे हे। अंबिकापुर अऊ जगदलपुर हवाई अड्डा म घलो सुविधा के विस्तार करे गे हे।

गरीबहा मन बर मुफ्त राशन

छत्तीसगढ़ सरकार ह 68 लाख गरीब परिवार ल 5 साल तक मुफ्त राशन दे के फईसला ले हे। एखर बर बजट म 34 सौ करोड़ रुपिया के प्रावधान हे। दीनदयाल उपाध्याय भूमिहीन कृषि मजदूर योजना डाहर ले हर बछर 10 हजार रुपिया के आर्थिक सहायता दे जाही। एखर बर घलो बजट म 500 करोड़ रुपिया के प्रावधान करे गे हे।

राजिम म लहुटिस रौनक

राज्य के संस्कृति के संरक्षण अऊ संवर्धन बर राजिम मेला के आयोजन फेर ओखर जुन्ना स्वरूप म कर दे गे हे। बस्तर म प्राचीन काल ले चले आत कई ऐतिहासिक मेला मन ल घलो शासकीय संरक्षण अऊ सहायता दे जात हे।

रायपुर ल आईटी हब

रायपुर ल आईटी हब बनाए के बुता शुरू हो गे हे। अभी के बेरा म 2 आईटी कंपनी संग एमओयू होए हे जेन ल फर्नीस्ड बिल्ड-अप एरिया घलो उपलब्ध करा दे गे हे। छत्तीसगढ़ सरकार नवा रायपुर ल बेंगलुरू जईसन आईटी हब के रूप म विकसित करे के दिसा म बुता करत हे।

शहीद वीर नारायण सिंह स्वास्थ्य योजना

राज्य म स्वास्थ्य सुविधा के विस्तार बर आयुष्मान भारत प्रधानमंत्री जन आरोग्य योजना के संगे-संग शहीद वीरनारायण सिंह स्वास्थ्य योजना शुरू करे के निर्णय ले गे हे। राज्य के दो बड़का मेडिकल कॉलेज अस्पताल, मेडिकल कॉलेज अस्पताल रायपुर अऊ छत्तीसगढ़ इंस्टीट्यूट ऑफ मेडिकल साइंस बिलासपुर (सिम्स) म भवन विस्तार अऊ सुविधा मन के विकास के बुता शुरू कर दे गे हे।

आईआईटी जईसन प्रौद्योगिकी संस्थान

राज्य म उच्च शिक्षा विभाग राष्ट्रीय शिक्षा नीति 2020 ल लागू करे के फईसला ले गे हे। आईआईटी जईसन राज्य के जशपुर, बस्तर, कबीरधाम, रायपुर अऊ रायगढ़ म प्रौद्योगिकी संस्थान के निरमान करे जाही। राज्य म छत्तीसगढ़ उच्च शिक्षा मिशन के घलो स्थापना करे जाही।

राज्य-राजधानी क्षेत्र के विकास बर एससीआर

ऱाष्ट्रीय राजधानी क्षेत्र विकास योजना जईसनहा राज्य राजधानी क्षेत्र के विकास बर एससीआर बनाए जाही। एखर बर विस्तृत योजना बनाए के प्रावधान करे गे हे। एखर ले राज्य म शहरी विकास ल बढ़ावा मिलही।  

इंडस्ट्रियल कॉरिडोर

राष्ट्रीय राजमार्ग अऊ ओखर आसपास औद्योगिक गतिविधि ल बढ़ावा दे बर कोरबा-बिलासपुर इंडस्ट्रियल कॉरिडोर के निरमान करे के फईसला ले गे हे। इन्वेस्ट इंडिया जईसन इन्वेस्ट छत्तीसगढ़ आयोजित करे बर बजट म पांच करोड़ रुपिया के प्रावधान करे गे हे। खनिज के परिवहन म पारदर्शिता रखे बर खनिज परिवहन बर ऑनलाइन ई-ट्रांजिट पास जारी करे के व्यवस्था फिर शुरू करे गे हे। एखर ले राज्य ल मिलईया राजस्व म वृद्धि होही।

आर्थिक सलाहकार परिषद

छत्तीसगढ़ सरकार कोती ले राज्य म आर्थिक विकास ल गति दे बर विशेषज्ञ संस्था मन ले परामर्श करे बर अऊ देश-दुनिया म चलईया बेस्ट प्रैक्टिस ल राज्य के परिस्थिति के अनुरूप लागू करे के मंसा ले छत्तीसगढ़ आर्थिक सलाहकार परिषद के गठन करे के निरनय ले गे हे।