जोगी के पार्टी ल झटका, नइ मिलिस नारियल

रायपुर । पूर्व मुख्यमंत्री अजीत जोगी के पार्टी छत्तीसगढ़ जनता कांग्रेस ल ओखर मनपसंद चुनाव चिन्ह नइ मिलिस। अब नवा सिरा ले चुनाव चिन्ह बर पार्टी ल कवायद शुरू करे बर पड़ही। पार्टी ह कार्यकर्ता मन ले तीन चुनाव चिन्ह भेजे बर कहे हवय। ए चिन्ह ल चुनाव आयोग ल भेजके पार्टी कोनों एक ल चिन्ह बनाए के अनुरोध करही।
पूर्व मुख्यमंत्री जोगी के पार्टी ल एक बार फिर चुनाव आयोग ह झटका दिस हे। जोगी ह चुनाव आयोग ले अपन पार्टी बर नारियल के मांग करे रिहिस हे। लेकिन आयोग ह उंखर मनपसंद चुनाव चिन्ह ल दे बर इंकार कर दिस। ए ह पहिली बार नइए। जब चुनाव आयोग ह उंखर पसंद ल नाकार दिस हे। एखर पहिलि पार्टी के नाम ल लेकर चुनाव आयोग ह जोगी ल झटका दे चुके हवय। फिलहाल चुनाव आयोग ह छत्तीसगढ़ जनता कांग्रेस ल नारियल चुनाव चिन्ह दे बर इनकार कर दे हे। जेखर बाद पार्टी ल नवा चुनाव चिन्ह तलाश करे बर पड़ही।
जानकारी के मिले हे कि गोवा के एक क्षेत्रीय पार्टी ल नारियल चुनाव चिन्ह पहिली ले आवंटित हो चुके हवय। गोवा म ए पार्टी ह पिछला चुनाव म कई प्रत्याशी चुनावी मैदान म उतारे रिहस हे। ऐखर सेती केंद्रीय चुनाव आयोग ह छत्तीसगढ़ जनता पार्टी(जोगी) ल नारियल चुनाव चिन्ह आवंटित करे बर मना कर दे हे।
नारियल के जगह अब जोगी कांग्रेस ल नवा चुनाव चिन्ह केंद्रीय आयोग ल भेजना होही। सूत्र मन के कहिना हे कि नवा चुनाव चिन्ह बर जोगी कांग्रेस ह पार्टी के लोग मन ले सुझाव मांगे हे। जम्मो पार्टी पदाधिकारी मन ल पूछे गेहे कि विधानसभा चुनाव बर कोन चुनाव चिन्ह बेहतर होही। जम्मो झन ल तीन विकल्प दे बर कहे गेहे। ऐखर बाद तीन चुनाव चिन्ह के चुनके ओला आयोग डहर भेजे जाही। अमित जोगी के कहिना हे कि गुलाबी रंग पार्टी के पहचान बन गेहे। जब तक चुनाव चिन्ह फाइनल नइ हो जात हे। एही रंग के संग प्रचार-प्रसार करे जाही।