गांव-गांव पहुंचिस बैंक: रिंगो कश्यप बनिन मिसाल, दूरिहा इलाका म देवत हें बैंकिंग सेवा

रईपुर. कोण्डागांव जिला के मर्दापाल तहसील के आखिरी छोर म बसे सुदूर गांव कुधुर, जउन ह कभू माओवाद के प्रभाव के सेती विकास ले कोसो दूर रहिस, आज बदलाव के नवा कहानी लिखत हे। जिहां कभू गांव वाले मन ल सरकारी योजना के पइसा निकाले बर लगभग 20 किलोमीटर दूरिहा मर्दापाल के बैंक तक जाय बर पड़त रहिस, ओखरे जगा अब गांव म ही बैंकिंग सुविधा मन मिलत हे।

ये बड़े बदलाव राष्ट्रीय ग्रामीण आजीविका मिशन के पहल अउ ‘बीसी सखी’ के रूप म काम करत रिंगो कश्यप के मेहनत ले संभव होय हे। ग्राम पंचायत कुधुर के गुमियापाल पारा के रहइया रिंगो कश्यप ह न केवल कुधुर, बल्कि तुमड़ीवाल अउ टेकापाल के गांव वाले मन ल घलो घर-घर जाके बैंकिंग सेवा देवत हें।

रिंगो कश्यप ह बछर 2020 म “मां पार्वती स्व सहायता समूह” ले जुड़ के अपन यात्रा सुरु करिस। ओखर बाद बछर 2024 म राष्ट्रीय ग्रामीण आजीविका मिशन के तहत ट्रेनिंग पा के ओमन ‘बीसी सखी’ के रूप म काम सुरु करीन। आज ओखर माध्यम ले गांव वाले मन ल महतारी वंदन योजना, सामाजिक सुरक्षा पेंशन, प्रधानमंत्री आवास योजना जइसन कतको सरकारी योजना के पइसा गांव म ही अराम ले मिलत हे। एखर संग ही बिजली बिल पटाए अउ आन लेनदेन घलो अब बहुते सरल हो गे हे।

अब तक रिंगो कश्यप ह 355 ले जादा सफल लेनदेन कर चुके हें, जेखर कुल रकम 6 लाख 75 हजार रुपिया ले घलो जादा हे। ये काम ह न केवल गांव वाले मन के दुख-पीरा ल कम करे हे, बल्कि रिंगो कश्यप बर खुद के रोजगार के एक मजबूत जरिया घलो बन गे हे।

ओमन स्व-सहायता समूह ले करजा लेके एक ठन छोटा कुटी किराना दुकान घलो सुरु करे हें, जेखर ले ओखर परिवार के आर्थिक स्थिति म बड़ सुधार आय हे। अभी के बखत म ओमन ल हर महीना लगभग 10 हजार रुपिया के कमाई होवत हे, अउ आघू चल के ओमन अपन ये काम ल अउ बढ़ाना चाहत हें।

“रिंगो कश्यप जइसन महिला मन के मिहनत अउ सरकार के योजना मन के सही तरीका ले काम करे के सेती आज दूरिहा-देहात के इलाका म विकास ल नवा रफ्ता मिलत हे। राष्ट्रीय ग्रामीण आजीविका मिशन के माध्यम ले स्व-सहायता समूह म जुड़ के महिला मन न केवल आर्थिक रूप ले मजबूत होवत हें, बल्कि समाज म अपन एक नवा पहचान घलो बनावत हें।”