कौशल विकास सामुदायिक केन्द्र युवा मन ल ट्रेनिंग अउ रोजगार के हुनर दे म निभाही बड़का भूमिका: वन मंत्री कश्यप
कन्या छात्रावास अउ सामुदायिक भवन संग करोड़ों के विकास काम मन के होइस लोकार्पण
रायपुर. वन अउ जलवायु परिवर्तन तथा सुकमा जिला के प्रभारी मंत्री केदार कश्यप ह अपन एक दिन के प्रवास म सुकमा पहुंचिन। ए मउका म ओमन जिला म विकास के अलग-अलग बुता ल नवा गति देवत कतको महत्वपूर्ण निर्माण काम मन के लोकार्पण करीन।
मंत्री श्री कश्यप ह सबले पहिली सुकमा के वार्ड नंबर 03 पुसामीपारा म 20 लाख रुपय के लागत ले बने ‘कौशल विकास सामुदायिक केंद्र’ भवन के लोकार्पण करीन। ओमन कहिन कि ए केंद्र ह क्षेत्र के जुवा मन ल ट्रेनिंग अउ रोजगार के हुनर दे म बड़े भूमिका निभाही, जेकर ले ओ मन आत्मनिर्भर बन सकही।
जिला के प्रभारी मंत्री श्री कश्यप ह एक करोड़ 62 लाख रुपय के लागत ले बने ‘प्री-मैट्रिक कन्या छात्रावास झापरा’ के लोकार्पण करीन। ओमन छात्रावास के भीतर जाके जम्मो व्यवस्था मन ल देखिन अउ ओकर जानकारी लीन।ए बखत पढ़इया नोनी मन ह बहुते सुग्घर सांस्कृतिक कार्यक्रम देखाइन, जेकर ले कार्यक्रम ह अउ गरिमामय बन गे। कार्यक्रम म गोठियावत मंत्री श्री कश्यप ह कहिन कि अभी के सरकार के बखत म विकास के काम मन ल गजब के गति मिले हे।
ओमन बताइन कि कतको बछर ले बंद पड़े राम मंदिर केरलापेंदा ल फेर ले गांव वाले मन बर खोल दे गे हे अउ हनुमान जयंती के मउका म बड़े भंडारा के आयोजन करके समाजिक एकता अउ सांस्कृतिक परंपरा मन ल अउ मजबूत करे गे हे।
वन मंत्री ह कहिन कि छत्तीसगढ़ के बनय ले लेके आज नक्सलवाद ल खतम करे के डहार म सरकार ह लगातार बड़े अउ कड़ा फैसला लीस हे। ओमन ए बात के तको जिक्र करीन कि साल 2017 म सुरू होय ये छात्रावास ह कतको बाधा मन ल पार करके अब 2026 म बन के पूरा होय हे अउ लइका मन बर समर्पित करे गे हे। एहा सरकार के अपन काम ल पूरा करे के मजबूत इच्छाशक्ति ल देखाथे।
मंत्री श्री कश्यप ह पढ़इया नोनी मन के उत्साह बढ़ावत कहिन कि “तुमन जम्मो लइका मन देश अउ समाज के भविष्य अउ। शिक्षा ही सफलता के सबले बड़े माध्यम आय। पढ़-लिख के अपन दाई-दादा अउ क्षेत्र के नाम रौसन करो अउ अपन पसंद के विषय चुन के आगू बढ़ो।”
जिला के प्रभारी मंत्री ह कहिन कि पहिली के सुकमा अउ आज के सुकमा म बहुत बड़े बदलाव आय हे। अब विकास के काम मन के फायदा ह आम जनता तक पहुंचत हे। ओमन बताइन कि महतारी वंदन योजना ले दाई-बहिनी मन ल आर्थिक मदद मिलत हे, जेकर ले ओ मन मजबूत होवत हें। ओहिच डहार, माइलोगन मन ल आत्मनिर्भर बनाय बर ‘लखपति दीदी’ जइसन योजना ह ग्रामीण महिला मन के जिनगी म सुग्घर बदलाव लावत हे। ए मउका म वरिष्ठ जनप्रतिनिधि श्री धनीराम बारसे ह तको ग्रामीण मन ल संबोधित करीन।
कार्यक्रम म महिला आयोग के सदस्य दीपिका सोरी, जिला पंचायत सदस्य कोरसा सन्नू, जिला पंचायत सदस्य माड़े बारसे, जनप्रतिनिधि धनीराम बारसे, अरुण सिंह भदौरिया, जनपद अध्यक्ष कोंटा कुसुमलता कोवासी, नगरपालिका अध्यक्ष सुकमा हुंगाराम मरकाम, नगर पंचायत दोरनापाल के अध्यक्ष राधा नायक अउ आन जनप्रतिनिधि मन संग भारी संख्या म ग्रामीण मन उपस्थित रहिन।
