छत्तीसगढ़ ला नक्सलवाद ले मुक्ति के डहर ले जाय बर उप मुख्यमंत्री विजय शर्मा के भव्य ऐतिहासिक अभिनंदन
- बाजा-गाजा के संग लाडू म तउल के जम्मो समाज अउ संगठन मन करिन उप मुख्यमंत्री के सम्मान
- “ये जीत जनभागीदारी, सुरक्षा बल मन के साहस अउ बस्तरवासी मन के भरोसा के जीत आय” – उप मुख्यमंत्री विजय शर्मा
रायपुर. छत्तीसगढ़ अउ पूरा देश बर ऐतिहासिक छन तब आइस, जब केंद्रीय गृह मंत्री अमित शाह ह 31 मार्च के सदन मा सशस्त्र नक्सलवाद के खात्मा के घोेसना करिन। लगभग चार दशक ले ए समस्या ले जूझत छत्तीसगढ़ ह मुख्यमंत्री विष्णुदेव साय के अगुवाई अउ प्रदेश के उप मुख्यमंत्री अउ गृह मंत्री विजय शर्मा के अटल संकल्प, सटीक रणनीति अउ लगातार कोसिस ले ए बड़े कामयाबी ला हासिल करिस।
ए अभियान मा भारतीय सेना, पुलिस अउ जम्मो सशस्त्र बल के जवान मन के अदम्य साहस, समाज के जागरूक भागीदारी, राजनीतिक नेतृत्व के इच्छाशक्ति, पत्रकार भाई मन के भूमिका अउ सबले बढ़के बस्तर के नागरिक मन के सहयोग के महत्वपूर्ण योगदान रिहिस। सबो झन के मिलजुल के कोसिस ले ही सशस्त्र नक्सलवाद के अंत मुमकिन हो पाइस अउ अब बस्तर मा खुसहाली के एक नवा शुरुआत होवत हे।”
सशस्त्र नक्सलवाद ले मुक्त छत्तीसगढ़ बने के बाद, उप मुख्यमंत्री अउ गृह मंत्री विजय शर्मा ह रविवार के पहिली बार अपन विधानसभा क्षेत्र कवर्धा पहुंचिन। उहां के स्थानीय महामाया चौक मा कवर्धा के लोगन मन ह ओकर बर एक भव्य ऐतिहासिक नागरिक अभिनंदन समारोह राखिन। ए कार्यक्रम मा हजारों के संख्या मा लोगन मन बाजा-गाजा अउ ढोल-नगाड़ा के संग सामिल होइन, जेकर से पूरा सहर मा जसन के माहौल दिखिस। सबो झन ला ए बात के गरब रिहिस कि कभू नक्सल प्रभावित कबीरधाम जिला के संग अब पूरा छत्तीसगढ़ ले डर अउ आतंक ला दूर करे मा अपन माटी पुत्र के बड़े योगदान हावय।
ए कार्यक्रम मा ब्राह्मण, यादव, ठाकुर, कुर्मी, साहू, सतनामी, निर्मलकर, गुप्ता, अहिरवार, लोधी, पटेल, गोंड, सेन, जैन, वैष्णव समेत जम्मो समाज के लोगन मन ह भव्य रैली निकाल के गृह मंत्री के स्वागत करिन। सबो झन ह मिल के विजय शर्मा ला लाडू ले तउल के ओकर अभिनंदन करिन। जिला प्रेस क्लब, यूथ क्लब, हरीतिमा परिवार अउ भाजपा के कार्यकर्ता मन घलो ए ऐतिहासिक पल के गवाह बनिन।
उप मुख्यमंत्री ह गायत्री मंदिर अउ गुरुद्वारा मा जाके प्रदेश के सांति बर अरजी लगाइन अउ भारतमाता चौक मा शहीद जवान मन ला सरधांजलि दीन। अपन भासन मा ओमन कहिन कि आज बस्तर के गांव मन मा लोगन मन अपन आंयगन मा खुल के हँसत हें। अब उहां डर नइ, बल्कि विकास के गोठ होवत हे। गांव के मेला-मड़ई मा फेर ले रौनक आ गे हे।”
श्री शर्मा ह कहिन कि जब केंद्रीय गृह मंत्री अमित शाह ह सदन मा नक्सलवाद के खात्मा के घोेसना करिन, त ओहा देश बर एक ऐतिहासिक छन रिहिस। मुख्यमंत्री विष्णुदेव साय के अगुवाई मा, पुलिस अउ जवान मन के साहस, पत्रकार मन के भूमिका अउ बस्तर के नागरिक मन के सहयोग ले ही ये ‘असंभव’ काम ह पूरा हो पाय हे। ओमन कहिन कि नक्सलवाद ह एक अइसन बिचार रिहिस जेहा सिरिफ़ बंदूक के नली ले सत्ता चाहत रिहिस, फेर हमर लोकतंत्र अउ विकास ह ओला करारा जवाब दे हे।
ओमन प्रधानमंत्री नरेंद्र मोदी जी के तारीफ करत कहिन कि जइसन राम मंदिर अउ धारा 370 के फैसला समय मा पूरा होइस, वइसने नक्सल समस्या के समाधान घलो मुमकिन होइस। अंत मा ओमन कवर्धा के लोगन मन के एतका मया अउ सनमान बर हिरदे ले आभार मानिन।
